Kano 'Nagwala' Sa Selda Patay

CEBU - Namatay sulod sa detention cell ang usa ka Amerkanong gidakop ug gipriso sa mga pulis tungod sa sobrang kahubog apan pag-abot sa karsel gikatahong nagwala kini ug miparok-parok sa iyang ulo ngadto sa semento sa selda ug puthaw nga rehas sulod sa Bantayan Police Station sa isla sa Bantayan niadtong Sabado sa alas 3:15 sa hapon.

Ang namatay’ng Amerkano mao si Paul Cortis Agostinelli, kasamtangang nagpuyo sa barangay Binaobao sa nahisgutang lungsod.

Matud ni Insp. Almirante Bacayo ang hepe sa Bantayan Police dihang nahinabi sa Banat News ang maong langyaw una nang gireklamo sa iyang live-in partner nga si Clara Cose Paloma, 45, tungod sa giingong pagdagmal niini kaniya human mahubog nianang pagka alas 8 sa buntag niadtong Sabado.

Paglabay sa pipila ka gutlo ang mga silingan na mismo sa magtiayon ang midangop sa kapolisan ug mireklamong nanghagis sa ilang dapit si Agostinelli ug kusog kaayo ang volume sa tukar niini gawas   pa sa pagpangguba niini sa mga butang diha sa balay’ng giabangan.

Matud ni Bacayo nga ilahang gidakop ang langyaw ug gikustodiya gumikan sa kagrabe sa kahubog niini aron usab siya malikay sa kagubot. Gikatahong nakahurot og unom ka kahong beer si Agostinelli niadtong tungura.

Apan dihang diha na kini sa sulod sa selda nagpadayon kini sa pagpanghagis ug giingong gipangkulata ang duha ka mga piniriso sa selda hinungdan nga ilaha silang gibuwag ug nag-inusara nalang sa selda si Agostinelli.

Gikatahong wala gihapon mohunong ang langyaw sa pagpanghagis ug miparok-parok sa ulo niini ngadto sa sementadong bungbong ug sa rehas nga puthaw ug naghubo sa tanang sapot lakip na underwear.

Gikatahong nakit-an nilang nagkadugo na ang kalawasan niini lakip sa siko, bukton, ug ulo. Tungod sa kabalakang dunay dautang mahitabo kaniya daling mipakuha og doktor sa Bantayan District Hospital aron paimnon kini og tambal nga makapakalma nianang pagka alas 2 sa hapon.

Apan sa pag-abot sa maong doctor gikatahong nakuyapan na nga nagbuy-od ang langyaw sa salog maong gidali nila kini og dala sa tambalanan.

Apan paglabay sa pipila ka minutos nakabsan kini sa kinabuhi ug subay sa pasiunang eksaminasyon giingong ‘suffocation’ kun kakulang sa hangin ang hinungdan sa kamatayon niini. - BANAT NEWS