Tawo giligid og tigbas

CEBU - Nabulit sa samad ang kalawasan sa usa ka tawo human tigbasa sa iyang silingan sa sitio Capasanan, barangay Casili, dakbayan sa Mandaue alas 11:00 pasado ang takna sa miaging gabii.

Ang biktima mao si Ricardo Mendaros, 35, ulitawo, ug ang suspetsado mao si Gerardo Castro, 33, kinsa pulos nagpuyo sa maong dapit.

Si PO3 Tirso Plania sa kapolisan sa Presinto 6 sa Canduman Police Station mibutyag sa Banat News nga may panagdumot nang daan ang biktima ug ang suspetsado sa miaging bulan.

 Ang biktima kinsa hubog niadtong higayona namato sa balay sa suspetsado busa mihiwasa ug migawas ang naulahi ug giligid og tigbas ang biktima.

Ang biktima kinsa napakyas sa pagpanagang nasabak sa liog, abaga, bukton ug uban pang bahin sa iyang kalawasan ug gidala dayon sa kapolisan sa Vicente Sotto Memorial Medical Center aron sa pagsalbar sa kinabuhi niini.     

 Samtang ang suspetsado nadakpan usab dayon ug sa pagkakaron nagtingkagol na sa prisohan. - BANAT NEWS