Tulo ka tulisan nadakpan

CEBU - Tulo ka suspetsadong tulisan   ang nadakpan sa kapolisan human sa nahitabong ginukdanay gikan sa flyover sa Subangdaku hangtud sa dalan M.L. Quezon sa barangay Maguikay sa dakbayan sa Mandaue alas 5 pasado ang takna sa hapon niadtong miaging adlaw.

Ang nadakpan mao sila si Sajitan Bodilles, 18, Jay Book, 19, ug Noel Manacap, 18, nga pulos taga Poblacion, dakbayan sa Toledo kinsa nadakpan nila ni PO2 Jose Rivera ug mga kauban sa Presinto 4 sa Casuntingan Police Station.

Si PO3 Remegio Arciaga nga nahinabi sa Banat News miingon nga ang tulo maoy gitumbok ni Marivic Soriano, 37, maoy mitulis kaniya human siya makanaog sa jeepney diha sa Subangdaku.

Nakuha gikan sa tulo ka suspetsado mao ang cellphone, bag nga maoy gisudlan sa salapi ug mga grocery items sa biktima.

Matud ni PO3 Arciaga gitiunan sa tulo ang biktima ug mideklarar og tulis, tungod sa kahadlok gihatag sa biktima ang dala niining butang nga naglakip sa iyang shoulder bag, cellphone ug mga grocery nga pinalit niini.

Dihang nanglakaw na pahilayo ang mga tulisan daling misinggit pagpangayog tabang sa mga estambay si Soriano kinsa daling gitabangan sa mga estambay. – BANAT NEWS