2 manager 'nangmolestya'

CEBU - Nagtingkagol sa Talisay City detention cell ang duha ka manager sa usa ka food chain nga nahimutang sa barangay Tabunok, dakbayan sa Talisay human sila masikop sa mga polis tungod sa kasong acts of lasciviousness kagahapon sa hapon diha sa ilang gitrabahoan.

Ang mga suspetsado mao sila si Mark Anthony Rodriguez, 27-anyos taga Punta Princesa, dakbayan sa Sugbu ug Jimuel Marino, 26, taga Maracas, Lahug niining dakbayan.

Si Senior Inspector Jovito Canlapan sa pakighinabi niini sa Banat News kagahapon sa hapon mibutyag nga ang duha adunay kasong acts of lasciviousness nga gipasaka batok kanila sa kanhi empleyadong babaye diha sa maong food chain sa sala ni Judge Mario Manayon sa Municipal Trial Court in Cities sa dakbayan sa Talisay.

Ug niadtong Lunes milusot ang warrant of arrest sa duha ug gipanid-an kini sa mga warrant server nga sila si SPO2 Jeromen Abatayo ug PO3 Ronaldo Dano.

Matud niini nga base sa ilang nahibaw-an sa paryente sa biktima nga giingong hikapon sa mga suspek ang mga pribadong parte sa lawas niini samtang nagtrabaho ilabi na atol sa gabii. – BANAT NEWS