CEBU - Patay ang usa ka amahan samtang samaran ang anak niini dihang gipusil kini sa usa ka sakop sa akyat bahay sa P.J Almendras Street, barangay Suba, dakbayan sa Danao sa milabay’ng kadlawon.
Ang biktima mao si Alejandro Tito Jr., 59, minyo, residente sa maong dapit ug usa ka drayber sa traysikad ug samaran usab ang anak niini nga si Brian Tito.
Si SPO4 Teofilo Deguilmo, duty desk officer sa kapolisan sa dakbayan sa Danao nagkanayon nga samtang nahinanok ang pamilyang Tito, mga alas 2:50 sa milabay’ng kadlawon namatikdan sa anak nga babaye niini ang pagkuha sa mga blade sa jalousie sa bintana sa usa ka giingong sakop sa akyat bahay hinungdan nga misinggit kini ug nakamata si Alejandro ug ang anak niini nga si Brian.
Gumikan niini misusi si Brian sa gawas kung kinsa ang responsable apan dihang nagkatagbo sila ug ang kawatan, si Brian gidugsak sa nawong sa maong kawatan sa sumbohan sa pusil hinungdan nga nasamad kini.
Ug dihang misulod og balik si Brian, si Alejandro na usab ang migawas apan walay swerte kay kalit kining gipusil sa kawatan.
Si Alejandro ang nakaangkon og samad pinusilan sa dughan ug uban sa iyang anak nga si Brian dali silang gidala ngadto sa Danao District Hospital.
Apan si Alejandro ang wala na makaabot nga buhi sa maong tambalanan.
Ang kawatan ang dali usab nga nakaikyas ug tungod sa ka kalit sa insidente wala kini mailhi ni Brian.
Ang kapolisan sa Danao ang padayon pa sa ilang imbestigasyon sa maong insidente. – BANAT NEWS