Saavedra wala motunga's hearing

CEBU - Gipangita na ang nagpailang whistleblower nga si Crisologo Saavedra sa iya kanhing mga empleyado sa Essence Spa diha sa SM City Cebu tungod kay ang self-proclaimed whistleblower nangindyan ug wala mutunga sa ilang hearing niadtong miaging adlaw.

Upat ka mga kanhi empleyado mipasaka og labor case batok kang Saavedra diha sa National Labor Relations Commission (NLRC-7) niadtong miaging Oktobre 29 tungod sa ilang pagtuo nga sila gilupigan sa ila kanhing amo ug wala ihatag ang igong suholan ug hustong benepisyo nga nalatid sa balaod.

Gawas niini, sila si Iron Pono, Jocelyn Mabanto, Hilda Abante ug Elviro Quita miinsister nga ilegal usab nga gitaktak ni Saavedra sa ilang trabaho.

Ang nagpailang whistleblower sa lamppost controversy igo lang mipadala og suwat ngadto kang labor arbiter Philip Montances sa kapakyas niini pagtunga sa hearing.

Gipasabot ni Saavedra nga siya wala katunga sa gitakdang husay tungod kay siya giingong dunay laing giatiman nga susama ka mahinungdanong kaso.

Tungod sa kapakyas ni Saavedra pagtunga sa hearing, kini subling gitakda ni Montances karong alas 2 sa hapon.

Ang mga reklamante nanghinaot nga motunga na ang nagpailang whistleblower ug atubangon niini ang ilang gipasaka nga reklamo.

“Nanghinaot mi nga dili siya maglikay-likay, moatubang siya namo ug motunga sa hearing aron iyang tubagon among reklamo,”sumala ni Elviro Quita.

Gawas sa gireklamo sa mga kanhi empleyado ni Saavedra nasuta usab sa Banat News nga walay business permit gikan sa Cebu City Hall ang Essence Spa niini diha sa SM.

Ang nahisgutang negosyo gihulagway sa Revenue Task Force sa City Hall nga ilegal base usab sa Business Tax Ordinance sa dakbayan. – BANAT NEWS