'Balik Mandaue' gipatuman

CEBU - Dako og pagsalig si Mayor Jonas Cortes nga makadani og mga molupyo sa dakbayan sa Mandaue nga tua na magpuyo sa ubang dapit nga mamauli sa dakbayan ug mobisita sa kanhi nila mga pinuy-anan sa siyudad pinaagi sa programang “Balik Mandaue.”

Si  Cortes nagkanayon nga mas gipalapdan pa karon ang “Balik Mandaue” nga programa kini aron usab madani ang mga Mandauehanon nga tua na magpuyo sa ubang lugar.

Matud pang Cortes dunay mga lumad nga taga Mandaue nga milambo na sa ilang pagpuyo sa ubang dapit ug nagtoo siyang dako usab sila og matabang sa ekonomiya sa dakbayan.

Ang bag-ong natukod nga Mandauehanons Inc. maoy nangulo sa halapad nga pagpangandam alang sa dakong kalihukan sa buwan sa Mayo sa tuig 2009.

Liboan ka mga balikbayan ug mga Mandauehanon nga nagpuyo na sa laing probinsya ang mipadayag na sa ilang suporta sa programa nga gilusad sa mayor sa maong dakbayan. – BANAT NEWS