Garganera padayon sa hagit vs. Osmeña bahin sa SRP issue

CEBU - Nagpabilin gihapon ang hagit ni Kagawad Joel Garganera sa barangay Tinago nga pag-resign sa katungdanan kung mahalin ang South Road Properties (SRP) niining tuiga.

Kini bisan pa man kung wala dawata ni Mayor Tomas Osmeña ang maong hagit dihang iyang giluwatan pipila ka buwan na ang nakalabay.

Giklaro ni Garganera nga ang tumong sa iyang hagit nga doblehon ang gihimong lakang sa kagamhanan sa dakbayan pagbaligya sa SRP.

“Ang ato lang ba nga it can add pressure nila to work doubly hard nga mahalin ang SRP kay daghan man sab ang nagpaabot ana,” sumala ni Garganera.

Usa sa mga nagpaabot nga mahalin ang SRP mao ang mga senior citizen sa dakbayan nga gipasaligan ni Osmeña sa miaging eleksyon.

Kini mao ang paghatag og tagsa ka libo ka pesos atol sa ilang birthday ug laing usa ka libo ka pesos matag Disyembre isip pinaskuhan.

Apan gipadayag sa mayor nga ang iyang campaign promise mahatag lang ngadto sa mga senior citizen sa dakbayan kung mahalin na ang SRP.

Gitataw hinoon sa manager sa SRP nga si Nagiel Bañacia nga hapit na mahalin ang napulo ka ektarya sa SRP apan kini posibleng unya pa sa buwan sa Enero.

Nidugang pagkomedya si Bañacia nga dili usab sila gusto nga moluwat sa katungdanan ang konsehal nga kanhi barangay kapitan sa Tinago.

“Mas maayo nga dili mo-resign si Idol…but it’s a political challenge and I will not deal on that, but hopefully by middle of January next year duna na tay grasya,” matud ni Bañacia.

Sa kasamtangan, padayon pa nga gitun-an sa Joint Venture Committee ang proposal sa Filinvest nga giingong usa sa mga interesado diha sa SRP.

Matud ni Bañacia nga sa sunod semana posibleng mahuman na pagsusi ang nahisgutang proposal ug ma-publish na alang sa price challenge.

Miingon si Bañacia nga kung walay investor nga mo-challenge sa proposal sa Filinvest, mas dali na unya ang pagkahalin sa SRP.

Nagkanayon si Bañacia nga kung mapinalisar na ang kasabutan tali sa Filinvest, kini mobayad dayon og pasiuna nga dul-an sa P300 milyones sa dakbayan. – BANAT NEWS