Mga drayber Talisay supak sa P6.50

CEBU - Kusganong misupak ang mga drayber sa traysikol sa dakbayan sa Talisay nga himuong P6.50 ang minimum sa pletihan nga giaprubahan kagahapon sa konseho.

Si Mario Menyamen, Bise Presidente sa Federation of Talisay City Tricycle Drivers Operators Association (FTCTDOA) sa pakighinabi sa Banat News nagkanayon nga ang minimum nga pletihan karon sa traysikol sa Talisay P7 sa unang tulo ka kilometro ug dugang piso sa mosunod nga kilometro.

Kagahapon sa buntag gipatawag sila ni Konsehal Edward Alesna, tsirman sa Committee on Laws atol sa sesyon sa konseho ug gituki ang P.50 nga rollback sa pletihan sa traysikol.

Gikwenta ni Menyamen nga ang P7.00 nga minimum nga pletihan kuhaan og P.50 mahimo nalang kining P6.50 unya mohatag pa sila og P1.00 nga discount sa senior citizens ug estudyante mahimo na lang kining P5.50 ug ubos na kaayo kini.

Matud niya bisan og mikunhod ang litro sa gasolina padayon gihapong pagsaka ang presyo sa mga spare parts sa motorsiklo ug asayte sa ilang motor.

Si Menyamen midugang nga magpahigayon una sila og meeting sa maong tumong sa konseho.

Si Alesna mibutyag sa mga tigbalita nga naaprobahan na kagahapon ang pag-amendar sa ordinansa kabahin sa pagpakunhod sa pletihan sa traysikol ug ipublikar nalang kini sa mosunod nga adlaw.

Matud niini ang mga reklamo sa sumasakay maoy ilang mas gipaboran tungod sa kabarato nalang karon sa presyo sa gasolina subay usab sa kamandoan gikan sa Land Transportation Franchising and Regulatory Board (LTFRB).

Giawhag usab sa opisyal ang mga sumasakay ug ang mga drayber nga mag-andam og sinsiyo aron malikayan ang lalis ug ipalista ang plaka sa traysikol nga mangabusar ilabi na niadtong doble maningil.

Si Menyamen sa iyang bahin nagkanayon nga kasagaran sa mga mangayo og dobleng pletihan mao kadtong mga ‘labyog’ nga dili taga Talisay apan miawhag sa publiko sa pagsumbong dayon kung duna man sa ilang mga sakop ang mohimo niini. – BANAT NEWS