Gisulong gipatay

CEBU - Gipusil-patay ang usa ka amahan nga traysikad drayber ug maayong pagkabun-og sa anak niining lalaki nga gibunalan sa puloan sa armas dihang gisulod sa ilang balay sa wala pa mailhing suspek samtang natulog sa PJ Almendras St., barangay Suba siyudad sa Danao kagahapon sa alas 2:50 sa kaadlawon.

Ang biktima nga patay nang nahidangat sa Danao City District Hospital mao si Alejandro Tito Jr., 59, molupyo sa nahisgutang lugar ug usa ka traysikad drayber samtang nalagom ang walang bahin sa nawong sa iyang anak nga si Bryan Tito, kinsa gibunalan og puloan sa armas sa suspek.

Sa paghimo ning balita blangko pa ang kapulisan pagtumbok sa suspek nga maoy responsable sa krimen.

Matud ni SPO4 Edgar Gomez sa Danao City Police dihang nahinabi sa Banat News ang kamaguwangang anak sa biktima nga si Maribeth Tito Olivar nahigmata sa wala pa ang hitabo tungod sa tawong nakit-an niyang nihinay-hinay og guba sa jealousy blade sa iyang lawak aron mosulod.

Kini maoy hinungdan nga nisinggit si Maribeth dungan ang pagpangayo og tabang hinungdan nga nahigmata ang biktima ug si Bryan nidiretso og gawas sa balay aron sa pagsusi.

Dihang diha na sa gawas si Bryan usa ka traysikad ang iyang nakit-ang giparking sa gawas nga bahin sa ilang balay hinungdan nga iyaha unta kining duolon.

Apan usa ka lalaki ang kalit lang mibutho ug mition og wala matinong kalibre sa armas kaniya dayong diretso og hapos sa puloan niini sa iyang nawong hinungdan nga mikaratil siya og dagan balik sa balay.

Ang biktima kinsa misunod diay sa iyang anak mao dayoy gipusil sa suspek diha sa dughan hinungdan sa hinanali niining kamatayon.

Ang mamumuno daling miikyas human sa hitabo samtang gisuwayan pa unta og dala sa tambalanan ang biktima diin siya gideklarar nga dead on arrival.

Ang kapulisan padayon pang nag-imbestigar aron pagtumbok sa suspek ug sa motibo sa krimen tungod kay giingong wala makaklaro ang anak sa dagway niini. – BANAT NEWS