CEBU - Gibalhog na kagahapong adlawa sa Cebu City Jail ang usa ka prison guard nga sakop sa Cebu Provincial Detention and Rehabilitation Center (CPDRC) human kini madakpi dihang misuway og palusot og upat ka mga linikit nga marijuana niadtong Lunes sa alas 2:45 sa gate 3 diha sa maong bilanggoan.
Si PO3 Teodoro Lumanas sa Guadalupe Police Station nga gikahinabi sa Banat News nagkanayon nga kasong paghupot og illegal nga drugas o kun kalapasan sa section 11 sa RA. 9165 ang ilang gipasaka batok sa prison guard nga si Ricardo Lavador, 51, taga dakbayan sa Danao.
Si PO3 Lumanas nagkanayon nga si Lavador nadakpan sa mga kaubang mga gwardiya nga sila si Servillano Angcay ug Boltaire Temblor nga mga sakop sa Spectrum Security Agency nga maoy nag-duty sa gate 3 sa employees entrance sa CPDRC niadtong tungura.
Ang maong bilanggoan buwag ang mga gwardiyang nagbantay aron malikayan ang posibleng panagkunsabuhay, lain ang grupong gabantay sa sulod ug lain usab ang sa gawas.
Matud pa nga padulong na untang mosulod sa entrance si Lavador aron mo-duty sa sulod isip prison guard dihang girekisa ni Angcay ang itom nga bag niini.
Nakit-an sa sulod ang upat ka mga linikit nga marijuana hinungdan nga gidakop kini dayon ug gibalhog ngadto sa Guadalupe Police Station.
Dugang pa ni PO3 Lumanas nga ang akusadong si Lavador hugtanong nihimakak sa maong pasangil. – BANAT NEWS