Duha gipusil samtang nag-inom

CEBU - Duha ka lalaki ang gipusil sa managlahing dapit sa dakbayan sa Talisay diin usa kanila suspetsado sa mga nahitabong tulis sa maong dakbayan samtang nakig-inom niadtong Domingo sa gabii ug kagahapon sa kaadlawon.

Unang insidente nahitabo diha sa barangay Tabunok niadtong Domingo sa gabii diin usa ka Dondel Panilagao, 25, residente sa nahisgutang lugar ug kanhi dispatser sa mga PUJ maoy gipusil.

Si PO3 Edwin Alvaro mibutyag nga si Panilagao usa sa suspetsado sa mga nahitabong tulis sa siyudad.

Base sa imbestigasyon nakig-inom si Panilagao sa iyang mga higala dihang kalit lang mitungha ang wala mailhing tawo ug walay pangutana gipusil niini ang biktima.

Si Panilagao kinsa nakaangkon og samad pinusilan sa iyang tiyan ug daling gidala sa Talisay City District Hospital apan gibalhin kini sa Vicente Sotto Memorial Medical Center samtang ang gikatahapan daling miikyas.

Sa laing bahin, nalandig usab sa tambalanan ang usa ka 32-anyos nga lalaki human kini unaya sa pagpusil sa ilang silingan kagahapon sa kaadlawon diha sa sitio Ta-i, barangay Cansojong samtang kini nakig-inom sa mga higala.

Ang biktima mao si Alvin Iñego, residente sa lugar kinsa nakaangkon og samad pinusilan sa ibabaw nga bahin sa tuong paa ug gidala ngadto sa Vicente Sotto Memorial Medical         Center.

Gipangita pa ang mipusil kaniyang si Linde Delila kinsa gikatahong mibuhi og bati nga mga pulong ngadto sa biktima ug gisakyan sa naulahi hinungdan nga nahitabo ang linayogay ug misunod ang pagpusil sa suspek sa biktima.  (BANAT NEWS)