Fluvial sa Birhen sa Regla andam na

CEBU - Andam na ang umaabot nga “Fluvial Procession” alang sa kapistahan sa Birhen sa Regla sa dakbayan sa Lapulapu sumala pa sa Tourism Commission sa dakbayan sa Lapulapu pinaagi ni Director Rudy Villanobos.

Ang maong kalihukan sugdan pinaagi sa usa ka Santos nga Misa sa Marigondon Parish Church ug alas 7:00 sa buntag ipahigayon ang caravan uban sa imahen gikan sa  Marigondon Parish Church ngadto na sa  Pacific Cebu Resort (PCR) sa barangay Suba Basbas dakbayan sa Lapulapu diin naghuwat ang sakyan sa patron sa dakbayan sa Lapulapu.

Gikan sa PCR ang galleon mamidpid sa kadagatan sa Marigondon ngadto na sa Maribago ug Punta Engano ug moliko kini ngadto na sa Mactan hangtod na sa Muelle Osmeña wharf sa Poblacion.

Gipaabot nga mosakay sa galleon sila si Lapulapu City Vice Mayor Dr. Mario Amores mga konsehal nga sila si Junard Ahong Chan, Eddie Cuizon ug ABC Pres. Hon. Leo Mercado.

Samtang ang modawat sa Birhen sa Regla mao si Lapulapu City Mayor Arturo Radaza ug mga Konsehal nga sila si Damian Gomez, Queenie Malingin Ahmann ug Poblacion Brgy. Capt. Allen Demataga.

Gikan sa wharf magprusisyon padulong simbahan sa Birhen sa Regla ug sundan kini og Santos nga Misa. Magsugod na dayon ang siyam ka adlaw nga nobenaryo hangtud na sa kapistahan sa maong patron karong umaabot petsa 21 ning bulana. (BANAT NEWS)