18 anyos sikupon sa Talisay curfew

CEBU - Higpit nang ipatuman sa dakbayan sa Talisay ang curfew sa mga batan-on sugod karong Nobiyembre 15 sa alas 10:00 sa gabii hangtud na sa alas kwatro sa kaadlawon.

Ang dakbayan gikatahong nakasinati og problema sa mga kagubot nga sagad ang mga nipasiugda mga batan-ong maglibud-suroy diha sa kadalanan, mabiktima man o masuspek.

Si Konsehal Shirley Belleza, tsirman sa komitiba sa Kababayen-an, Kabataan ug Pamilya mibutyag kagahapon sa buntag nga ang sikupon sa curfew kadtong mga batan-on nga nagpanuigon sa 18-anyos paubos ug iimplementar kini sa 22 ka barangay sa siyudad.

Sa unang kalapasan ipatawag ang mga ginikanan sa mga batan-on ug ipaubos kini sa lecture kabahin sa pag-atiman sa ilang mga anak.

Sa ikaduhang kalapasan pamultahon og P50 ug kung walay ikabayad sa multa ipaubos kini sa civic service sulod sa upat ka oras ug sa ikatulong kalapasan ang nakalapas ang mobayad og multa nga P100 ug walay ikabayad ipaubos usab kini sa civic service sulod sa walo ka oras.

Ang siyudad ang mopahibalo niini ngadto sa publiko alang sa ilang kasayoran sa implementasyon sa curfew.

Ang kapolisan ang motabang usab sa maong kalihukan aron mamentenar ang kahapsay ug kalinaw.

Si Police Senior Inspector Jovito Canlapan, officer-in charge sa Talisay City Police Station mibutyag sa Banat News nga mopadala siya og mga polis matag barangay nga mopaluyo sa mga tanod atol sa roving sa mga lugar sa pag-implementar sa curfew.

Ang tanang mga batan-on nga masikop ang anha tapokon sa Talisay City sports complex sa barangay Poblacion.  (BANAT NEWS)