Negosyanteng hubog nanion

CEBU - Gidakop ug gibalhog sa detention cell ang usa ka negosyante nga giingong hubog ug gipasanginlang nagpakita sa iyang armas ug mihulga sa mga tawo niadtong Domingo sa kaadlawon diha sa atubangan sa Carcar Sports Complex nga nahimutang sa barangay Poblacion.

Si PO3 Jeoville Bacarisas ug mga kauban daling miresponde human madawat ang alarma ug ilang naabtan si Dante Alcoriza, 44, nagpuyo sa General Luna St. sa barangay Poblacion II sa nahisgutang siyudad nga nagdala sa iyang .38 revolver nga dunay upat ka buhing bala niini sulod sa tambor hinungdan ila kining gidakop.

Sa imbestigasyon ni Bacarisas nasuta nga hubog si Alcoriza niadtong higayona ug sa walay igong rason naghulga sa mga customers sa usa ka pizza house nga nahimutang duol sa sports complex.

Si PO3 Bacarisas mitug-an sa Banat News nga kasong grave threat ang gipasaka batok sa suspek human ang magtiayon sa maong tindahan nga sila si Margot ug Stephen Alcodia nipasaka og kaso batok sa suspek. (BANAT NEWS)