Mga BIN 'nagpabadlong'

CEBU - Gisugdan na sa kapulisan sa dakbayan sa Sugbu ang pagpalagpot niadtong mga badlungong miyembro sa Barangay Intelligence Network (BIN) ilabi na niadtong mga abusadong magdala’g armas nga way lisensya ug mas hawod pa sa tinuod nga polis.

Kini maoy gipahibalo ni Sr. Supt. Patrocinio Comendador human usab duha sa mga sakop sa BIN karon lang buwana ang nalambigit sa krimen sa pagpamusil ug pagpatay.

Sumala pa niini nga wa siya’y gitugtan sa mga BIN nga magdala’g armas labi na kun way lisensya hinungdan nga kun duna siya’y mahibaw-an niini iya gilayong palagputon.

Hinuon gipadayag niini nga ang nahimo sa ubang mga sakop sa BIN wala kini makaduhig sa maong grupo tungod kay nagtoo siya nga individual ug personal lang kining maong panghitabo nga way kalambigitan niini ang organisasyon sa BIN.

Nunot niini gimanduan na ni Comendador si Supt. Jonathan Abella, hepe sa Criminal Investigation Branch (CIB) ug Sr. Insp. Aileen Recla kinsa maoy naghupot sa mga BIN sa pag-account sa mga sakop niini.

Nasayran nga niadtong Sabado sa gabii usa ka BIN nga si Primo Retarino maoy suspetsado sa pagpusil patay sa traysikad driver nga si Richard David diha sa atubangang bahin sa Espina Village barangay Guadalupe.

Samtang sa milabay’ng gabii laing sakop sa BIN nga si Reynante Abella maoy suspetsado sa pagpusil sa usa ka panday nga si Rogelio Gamaya diha sa Banawa sa Guadalupe. Ang duha pulos nisibat human sa pagpamusil ug gipangita na karon sa kapulisan.

Si Comendador nibahad nga ilang tinud-on ang duha ka mga BIN ug pasakaan gyud kini og kaso sa ilang mga salaud nga nahimo. (BANAT NEWS)