Macho dancer naghubo sikop

CEBU - Napulo ka mga macho dancer ug tag-iya sa usa ka gay bar sa barangay Pusok, dakbayan sa Lapulapu gisikop sa mga sakop sa Criminal Investigation and Detection Group (CIDG-7) kagahapon sa alas 12:30 sa kaadlawon human masakpi nga nagpasundayag og malaw-ay sa entablado.

Sa report ni Supt. Ritchie Posadas, deputy director sa CIDG-7, nasayran nga ang grupo ni Chief Insp. Rogarth Campo mihimo og operasyon sa barangay Pusok, dakbayan sa Lapulapu ubos sa programa sa Philippine National Police nga Oplan Magdalena.

Atol sa ronda nga gihimo sa Poseidon Entertainment Gay Bar, naaktohan ang usa ka macho dancer nga si Rod John Padal nga nagpasundayag sa entablado pinaagi sa akto nga pagkaligo sa shower nga hubo ang kalawasan, samtang ang mga kustomer nga mga mahuyang ug mga babaye nagtan-aw kaniya.

Sumala pa sa report ni Posadas nga si Padal naaktuhan sa mga operatiba nga nagsayaw-sayaw samtang nag-shower hinungdan nga nakuhaan kini og hulagway.

Gawas kang Padal, nasikop usab ang laing siyam ka mga macho dancer.

Nasikop usab ang tag-iya sa maong gay bar nga nailang si John Angeles alias Raffy.

Ang operation manager sa maong gay bar nga nailang si Tony Lakandula nagpaka-aron ingnong manawag sa ilang abogado apan nagdalidali kini og sakay og taksi pagsibat gikan sa maong lugar hinungdan nga naka-eskapo kini sa kapolisan.

Matud pa ni Supt. Posadas nga sukad sa ilang paglingkod sa CIDG-7, gipaubos na nila sa subsob nga surveillance ang maong gay bar ug human nila masota nga nagpasundayag og malaw-ay ang maong gay bar sa barangay Pusok.

Sumala pa ni Supt. Posadas nga si Chief Insp. Campo ug laing usa ka kauban niini, didto na sa sulod sa Poseidon sa dihang ang macho dancer nga si Padal misayaw sa entablado atubangan sa mga babaye ug mahuyang nga hubo ang kalawasan samtang naligo.

Pagkuha sa hulagway ni Chief Insp. Campo mikidlap ang flash sa iyang cellphone, hinungdan nga gidumog siya sa upat ka mga macho dancer sa maong gay bar aron ilogon ang iyang cellphone.

Si Chief Insp. Campo miangkon nga nakuyawan siya sa pagdumog sa mga macho dancers tungod sa kadagko nila og lawas, apan nagpasalamat siya tungod kay misulod usab dayon ang iyang mga kauban sa CIDG-7 ug mga asset nga didto sa gawas sa maong gay bar.

Ang deputy director sa CIDG-7 nagkanayon nga napasakaan kagahapon sa hapon og kasong kalapasan sa Revised Penal Code si Padal tungod sa malaw-ay niini nga pasundayag samtang naghubo. Apil sa pasakaan og kaso uban ni Padal ang iyang operation manager nga si Lakandula ug ang tag-iyang si Angeles.

Ang laing siyam ka mga macho dancer pasakaan og kasong bagransiya.

Silang Angeles, Padal ug siyam ka macho dancer nagtingkagol sa karsel sa CIDG-7. (BANAT NEWS)