Consolacion, Cordova, Olango distritohon

CEBU - Ang pagtipon sa lungsod sa Consolacion, Cordova ug isla sa Olango isip usa ka distrito sa lalawigan sa Sugbu maoy paagi nga kahatagan og kaangayan ang mga lumolupyo sa maong mga lugar nga madala ang ilang tingog ngadto sa hawanan sa Kongreso.

Kini ang gipadayag ni Antero “Jun” Caña nga tigpamaba ni kanhi Mayor Thadeo Ouano dihang nahinabi sa Banat News niadtong miaging adlaw.

Matud pa niya nga ang paghiusa sa Consolacion, Cordova ug isla sa Olango isip usa ka distrito nagpasabot usab nga angayang magbaton og usa ka kongresista ang maong mga lugar nga maoy morepresentar niini ngadto sa kongreso.

Si Caña miingon nga mahimo lamang nga usa ka distrito ang Consolacion, Cordova ug isla sa Olango kun makapasar ang gidaghanon sa mga molupyo niini nga gikinahanglan sa usa ka distrito ilabi na gyud kun mahimong lungsod ang isla sa Olango.

Sayo niini si Congressman Pablo Garcia sa ikaduhang distrito sa lalawigan miingon nga ang paghiusa sa Consolacion, Cordova ug isla sa Olango usa ka makiangayong lakang.

Gipasabot niya nga ang dili makiangayon kun ang dakbayan sa Mandaue nga kapin na sa 250,000 dili himuong usa ka distrito ilabi na nga nag-una pa kini sa dakbayan sa Lapulapu pagkahimong highly urbanized city .

Si Atty. Zally Maglig-on, executive staff ni 6th District Representative Nerissa Soon-Ruiz nagkanayon nga ang balaudnon kalabot niini gihandos na ngadto sa ubos Balay Balaoranan.

Gitataw niya nga si Kongresista Soon-Ruiz nga nagpaabot na lamang siya nga matuki kini ug gipaningkamutang matuman sa hingpit sa dili pa ang 2010 election. – BANAT NEWS