Drayber og Traysikad gipusil

CEBU - Naglunang sa iyang kaugalingong dugo ang usa ka traysikad driver nga nagbuy-od tupad sa iyang gimanehong traysikad human makaangkon og tulo ka samad pinusilan sa ulo dihang gipusil niadtong Sabado sa alas 10 sa gabii diha sa may atubangang bahin sa gate sa guardhouse sa Espina Village, barangay Guadalupe dakbayan sa Sugbu.

Wala nay kinabuhi’ng naabtan sa mga nirespondeng polis ang biktimang si Richard David, 27, dunay kapuyo, traysikad driver, taga sitio Sto. Niño barangay Capitol Site ning dakbayan.

Samtang ang gitumbok nga mamumuno mao ang manag-amahang sila si Primo Retarino, hingkod ang panuigon, Andrew Retarino ug kauban niini nga ginganlan lang og “Jun o Joe” nga nagpuyo diha sa nahigsutang lugar.

Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office ang biktima naghatud unta’g pasahero diha sa nahisgutang lugar.

Usa ka Ricardo Castillo, 52, sakop sa Barangay Intelligence Network (BIN) mitug-an sa mga imbestigador nga si Primo maoy mipusil kang David makadaghang higayon.

Matud pa niini ngadto sa imbestigador nga nag-duty siya niadtong higayuna diha sa gate sa village dihang iyang nakita ang suspetsadong si Primo ug ang wala mailhing babayeng pasahero sa biktima sa naglalis.

Sumala pa niini ang pasahero sa biktima nihangyo sa suspetsadong si Andrew ug Jun o Joe nga sila tugutang makaagi aron mosulod sa village ug naatol nga niabot usab ang suspetsadong si Primo.

Gikatahong si Primo mimando sa anak nga “ayaw na pasudla” hinungdan nga gibadlong sila sa biktima apan diha-diha nasuko si Primo ug nibunot og wala matinong kalibre sa armas ug gipusil makadaghang higayon tumong sa ulo sa biktima.

Human mahagba ang gipusil sa iyang trisikad, dali usab kaayong nangikyas ang tulo ka mga suspetsado ngadto sa sudlunong bahin sa nahisgutang lugar.

Si PO3 Geofrey Gutual nga gikahinabi sa Banat News nitug-an nga nakaangkon og tulo ka mga samad pinusilan sa ulo si David nga pulos milapos sa walang bahin sa ulo. – BANAT NEWS