Estambay Patay Human Sa Sukmagay

CEBU - Patay na nga nahidangat sa Chong Hua Hospital ang usa ka 54-anyos, estambay nga human usab makakita’g sinumbagay niadtong miaging adlaw diha sa V. Rama Avenue sitio Saypa, barangay Guadalupe ning dakbayan sa Sugbu.

Ang namatay giila sa kapulisan nga si Lazaro Estera, nagpuyo sa nahisgutang lugar samtang ang suspetsado mao ang iyang bayaw nga si Henry Romarate kinsa nadakpan sa kapulisan ug gitanggong na karon sa Guadalupe Police Station samtang gihikay pa ang kaso batok niini.

Sa imbestigasyon nila ni SPO2 Rey Cuyos ug mga kaubanan sa Homicide Section, ang biktimang si Estera ug suspetsadong si Romarate nagkalalis may labot kang “Tata Negro” kansang tinuod pangalan Crisostomo Llaguno nga gipasanginlang drug lord sa B. Rodriguez nga bag-ohay lang nakaipsot sa mga sakop sa Philippine Drug Enforcement Agency sa usa ka bulangan sa Talisay sa miaging semana.

Gikatahong wala magkasinabot ang duha ug miresulta sa ilang sinukmagay.

Ang silingan niining polis nga si PO2 Rodolfo Bolambao daling mi-uwang sa duha aron mahunong. Bisan diha nay polis gikatahong wala pa gihapon mohunong pagsige og panghagad og sukmagay ang suspek.

“Dali sumbagay ta diri usab kay naay gloves,” apan ang biktimang si Estera milakaw ug mibuhi’g mga pulong nga “dinunggabay lang ta ug maghiktanay.”

Diha-diha human tubaga ang suspek kalit lang kining natumba hinungdan nga gitabang siya sa mga kaliwat ug mga silingan sa pagdala sa maong tambalanan apan gideklarar kining dead-on-arrival.

Samtang ang suspetsadong si Romarate ang gidala usab sa Cebu City Medical Center tungod sa mga nahiagumang bun-og sa ulo ug nagisi nga wait, apan pagkahuman gibalhog siya sa Guadalupe Police Station.

Ang namatay nga si Estrera, gikatahong adunay bun-og sa agtang ingon man mga gagmay’ng pangos sa iyang mga paa ug batiis.

Si PO3 Geoffrey Gutual usa sa mga imbestigador sa Homicide Section sa CCPO nga gikahinabi sa Banat News nagkanayon nga namatay ang biktima ug gituohang giatake sa sakit sa kasing-kasing.

Matud pa niini nga ang suspetsadong si Romarate mamahimo gihapong mapasa-kaan og kasong homicide gumikan kay ang panag-sinukmagay niini sa biktima maoy naka-trigger sa pag-atake sa sakit sa biktima. – BANAT NEWS