CEBU - Duha ka mga mananagat ang gidagsa ug naluwas diha sa baybayon sa barangay Pooc lungsod sa Sta. Fe human sa pipila ka oras nga nagpalutaw-lutaw sa dagat human maguba ug malunod ang ilang tagsa-tagsa ka pumpboat tungod sa bagyong Quinta nga niigo dinhi sa Sugbu niadtong milabay’ng adlaw.
Ang duha ka magsuong mananagat nga taga barangay Tambongon lungsod sa San Remegio mao sila si Teojenes “Nene” Oyao, ug manghod niini nga si Ramon Oyao.
Ang duha pulos nabangalan sa mga tanod sa barangay nga sila si Orlando Espinosa ug Marlon Derder kauban ang barangay kagawad nga si Beboy Espinosa nga nag-roving daplin sa baybayon niadtong tungura.
Ang unang nabangalan alas 10:00 sa gabii niadtong Huwebes sa sitio Pangpang mao si Ramon Oyao ug nianang pagka alas 6:00 sa buntag kagahapon nabangalan nasab nila si Teojenes sa baybayon sa sitio Pooc Proper.
Ang duha ka mananagat gidala sa pinuy-anan ni Pooc barangay captain Jose Espinosa ug gihatagan og senina ug pagkahuman gisukit sukit.
Ilang gitug-an nga buntag pa sila niadtong Huwebes nigikan sa ilang balay aron sa pagpanagat gamit ang tagsa-tagsa nila ka pumpboat apan nianang pagka alas 10:00 sa buntag namatikdan nila ang pagkusog na sa hangin nga dunay dala nga mga pag-ulan ulan.
Gitug-an nila nga tungod sa kusog nga hangin nga nakamugna og dakong bawod naguba ang ilang mga pumpboat taliwala sa kadagatan sa San Remegio ug Sta. Fe samtang namasol sila niadtong higayuna.
Samtang alas 11:00 usab niadtong Huwebes atol sa pagpa-ubos sa public storm signal number 1 sa Sugbo nasangad usab ang usa ka cargo vessel human gihapak sa kusog nga bawod sa dayun na unta niining dunggo sa pantalan sa Sta Fe.
Gibutyag ni Mike Bonna sa Sta. Fe Coast Guard gikan sa Calbayog Samar ang M/V Mari Lourdes nga nagkarga og mga sapal sa lubi paingon sa Sta. Fe wharf.
Apan sa dayun na niining angkorahe sa pantalan gihapak kini sa kusog nga bawod ug nahandos sa mabaw’ng bahin hinungdan nga kini nasangad sa tuong bahin sa maong pantalan.
Sa paghimo ning balita gipaabot pa sa Coast Guard ang pagtaob sa dagat aron makuha og balik ang barko. – BANAT NEWS