PDEA agents diriyot dumoga

CEBU - Mga sakop sa Philippine Drugs Enforcement Agency (PDEA)-7 diriyot dumoga sa mga tawo sulod sa bulangan atol sa ilang pagsuway og dakop sa usa ka gipasanginlang drug personality sa Metro Cebu niadtong Huwebes sa gabii atol sa derby sa Talisay Sports Complex sa barangay Tabunok, dakbayan sa Talisay.

Ang grupo gipangulohan ni PO3 Yogi Filemon Ruiz ug lima ka mga ahente sa PDEA-7 aron unta dakpon si Crisostomo Llaguno alyas Tata Negro nga taga dalan B. Rodriguez sa dakbayan sa Sugbu kinsa diha sa maong bulangan niadtong tungura nga dunay P2 Million Bigtime Derby nga gipahigayon.

Apan ang maong suspek gikatahong mikisi-kisi ug may mga kauban tungod kay walay warrant of arrest nga napakita ang mga ahente.

Gumikan sa kagubot miresponde ang mga sakop sa Talisay City Police Station apan nakaipsot si Llaguno. Gikatahong kundili pa tungod sa mga polis nga miresponde gikabalak-ang mapiit ang mga ahente sa PDEA sa maong hitabo.

 Sumala pang Sr. Insp. Jovito Canlapan, hepe sa Talisay City Police wala sad silay kopya sa bisan unsang warrant of arrest batok kang Llaguno tungod kay di kini residente sa Talisay.

Ang abogado ni Llaguno nga si Atty. Danilo Yap ug ang promoter sa maong derby nga mao ang Central Visayas Breeders Association nagpa-blotter sa maong insidente diha sa Talisay City Police Station ug mibahad nga mosang-at og kaso sa PDEA.

Apan ang tigpamaba sa PDEA-7 nga si Jessie Tabanao sa pakighinabi sa Banat News nagkanayon nga kabahin sa hot pursuit operation ang suway pagdakop kang Llaguno human kini makaipsot sa buy bust operation niadtong Nobiyembre 4, 2008 sa alas 4:00 sa hapon diha sa dalan Lakandula, dakbayan sa Sugbo.

Matud ni Tabanao si Llaguno maoy naa sulod sa usa ka sakyanan nga mitunol og usa ka bultong shabu balor P50 mil ngadto sa iyang batabata nga mao sad ang mitunol niini sa poseur buyer sa PDEA-7.

Apan sa dayon na nilang dakop daling nakaipsot si Llaguno, ug hangtud karon wala pa nila mapasaka ang kaso tungod kay wala pa mogawas ang resulta sa laboratory examination sa maong drogas.

Gikatahong may impormanteng mitug-an sa presensya ni Llaguno diha sa maong bulangan maong giadto kini sa mga ahente aron sikupon sanglit padayon pa ang ilang pagpangita kaniya.

Sa laing bahin, si Paul Oaminal, Undersecretary sa Dangerous Drugs Board sa pakighinabi niini sa Banat News kagahapon nagkanayon nga huwaton nila ang kiha sa CVBA ug sa suspetsado.

Matud niini nga iyahang barogan ang iyang mga sakop aron makita nga dili pwedeng i-harass tungod sa pagtuman sa balaod ug dako sad ang iyang pagsalig sa grupo ni Ruiz.

Sumala pang Oaminal makadaghan nang higayon nga nalambigit si Llaguno sa mga kaso sa illegal nga drogas ug gani nasikop na kini sa ubang mga unit sa kapolisan apan kanunay’ng ma-dismiss ang kaso niini, labing ulahi niini niadtong Enero. – BANAT NEWS