Signal no.1 sa Cebu gahapon

CEBU - Gipaubos sa public storm signal number 1 ang tibuok Sugbu ug ubang mga dapit dinhi sa Visayas, Mindanao ug ubang bahin sa Luzon sugod kagahapon sa buntag tungod sa bagyong si Quinta.

Sa weather bulletin nga gipagawas sa PAG-ASA Mactan pinaagi ni Al Quiblat dihang nahinabi sa Banat News alas 8:15 kagahapon sa buntag gideklarar ubos sa public storm signal number 1 ang Camiguin, Biliran, Eastern Samar, Western Samar, Leyte, Southern Leyte, Bohol, Negros Oriental, Negros Occidental, Iloilo, Aklan, Capiz, Antique, Guimaras Island, Cuyo Island ug Cebu.

Niining mga lugar ang Pag-asa nipahimangno sa mga residente ilabi na niadtong nagpuyo daplin sa baybayon sa Bicol Region ug Eastern Visayas nga magbantay sa posibleng pagtumaw sa dagkong balod.

Samtang ang mga residente nga namuyo sa kabukiran gipahimangnuan usab sa PAG-ASA nga mohimo’g lakang kalabot sa posible unyang pagbaha O ba kaha landslides.

Ang state weather forcasters nagkanayon ang tropical depression makaapekto ug makamugnag danyos sa plantasyon sa saging, buwak ug kahumayan ug gipaabot nga ang hangin niini makaguba usab sa mga panimalay nga ginama lang sa gaay.

Nidugang ang Pag-asa ang maong bagyo delikado sa tanang gagmay’ng sakyanan sa kadagatan gumikan sa maong bagyo.

Ang tropical depression Quinta gipaabot ngadto sa 80 kilometros didto sa Cuyo Island ug 90 kilometros sa habagatang bahin sa San Jose, Occidental Mindoro ngadto na sa 440 kilometros aminahang kasadpan ang gikusgon sa hangin ang masinati didto sa San Jose karung buntag.

Samtang gipahimangnoan sa Cebu City Disaster Coordinating Council (CCDCC) ang mga Sugbuanon nga magmabinantayon sa mga pagbaha ug pagdahili sa yuta.

Partikular na niini kadtong mga molupyo duol sa kasapaan ug sa mga dapit sa siyudad nga giila sa CCDCC nga landslide prone areas.

Kagahapong adlawa daling gitigom ni Bise Mayor Michael Rama ang mga sakop sa CCDCC uban sa chairman niini nga si Konsehal Gerardo Carillo.

Gituki sa nahisgutang tigom ang ilang mga pagpangandam ingon man ang pag-monitor sa mga bukiran ug coastal barangays sa siyudad.

Gimanduan usab ang mga barangay officials nga i-activate niini ang Barangay Disaster Brigade ug motaho sa City Hall labot sa sitwasyon sa ilang barangay ug mag-monitor 24 oras hangtud di pa kagawas sa nasud ang maong bagyo. – BANAT NEWS