Obama unang itom nga Presidente sa Amerika

CEBU - Nahugyaw sa kalipay ang mga tigpaluyo ni Barack Obama dinhi sa nasud human sa makasaysayanong piniliay nga nag-ila kaniya isip first black president sa nasud sa Amerika.

Naangkon niya ang maong kadaugan dihang siya ang nangharos sa electoral college sa miaging Martes sa tungang gabii nga maoy nag-iway sa karaan na kaayong racial barriers sa maong nasud.

 Si Obama kinsa anak sa usa ka Negro nga amahan nga taga Kenya Africa ug puti usab nga inahan nga taga Kansas maoy napiling presidente sa nasud sa Amerika sa presidential election sa miaging Nobiyembre 4, 2008.

Gibuntog ni Obama ang puti niyang kaatbang nga si Republican Senador John McCain sa mga estado sa Ohio, Florida, Virginia ug Iowa.

Dugang nga mga dapit diin midaog si Obama mao ang Massachusettes, Connecticut, Illinois, New Jersey, Maine, New Hampshire, Washington DC, Rhode Island, and Minnesota.

Si McCain midaug usab sa mga estado sa Kentucky, Tenessee, West Virgina, South Carolina, ug Oklahoma.   

Nunot sa maong kadaugan ni Obama ang bagang duot sa katawhan ang dali kaayong nagkatapok sa Grant Park sa Chicago alang sa pagsaulog sa naangkon niining kadaugan.

Si Obama ug ang iyang runningmate nga si Senador Joseph Biden sa Delaware ang gikatakdang manumpa sa katungdanan isip presidente ug bise presidente sa Amerika karong Enero 20, 2009.

Si Obama isip ika 44 nga presidente sa Amerika sa iyang pamahayag miingon nga ang first order of presidential business nga iyang pagahimuon mao ang kasulbaran sa ekonomikanhong kahimtang sa nasud.

Dugang niini iyang gisaad ang pag-withdraw sa tropang Amerikanhon gikan sa Iraq sulod lamang sa 16 ka bulan nga gidugayon gikan sa iyang pagpanumpa sa katungdanan.

Nunot niini gipahayag ni House Speaker Prospero Nograles nga niining kadaugan ni Obama dako og paglaum ang Pilipinas nga padayong makabaton og maayong relasyon tali sa Amerika.

Miingon si Nograles nga dako kaayo og natampo ang mga Pilipino nga tua sa U.S manimuyo sa kadaugan ni Obama.

Alang kang Nograles dili usa ka yanong kadaugan ang naangkon ni Obama niining giisip nga labing makasaysayanong piniliay sa Estados Unidos diin sa unang higayon usa ka rasang itom ang nahimong presidente.

Samtang gidayeg pag-ayo ni Nograles ang pilderong si Republican senator John MacCain kinsa dali kaayong midawat sa iyang kapildihan batok ni Obama ug miawhag dayon sa iyang mga sagabay nga mga Republican sa pagsuporta sa administrasyon ni Obama.

Alang kang Nograles nga ang election sa America usa ka maayo unta kaayong sumbanan sa mga Pilipinong politiko. – BANAT NEWS