DVD ug CD may seizure order na

CEBU - Pormal nang miluwat og Warrant of Seizure and Detention (WSD) si Cebu Customs Sub-Port of Mactan Collector Atty. Ernesto Urbano sa mga nasakmit nga mga pirated DVD ug CD didto sa Cebu Pacific Cargo sa milabay'ng bulan sa Oktobre ning tuiga.

Base sa gihimong imbentaryo ni Customs Intelligence and Investigation Services( CIIS) Team Leader SA1 Jose Noel Torecampo sa Customs Mactan  nasuta nga mikabat sa 1,800 ka mga DVD ug CD nga gisulod sa duha ka mga karton nga pulos mga salida ug  mga Korea novela.

 Ang maong mga DVD ug CD napalgan sa Cargo area sa Cebu Pacific Airways niadtong Oktobre 15 ning tuiga luwan sa Cebu Pacific flight 5J-500 gikan sa kaulohan.

 Nasuta sa CIIS nga ang tag-iya sa duha ka kahon nga mga DVD ug CD mao ang kompaniyang AAA nga nahimutang sa dakbayan sa Sugbu apan hangtod ning pagbalita wala pay representante niini nga mipakita sa ilang buhatan.

 Ang maong mga ebidensiya anaa karon sa Galco warehouse ug human kaluwati og   WSD giduso dayon kini ngadto sa ilang Legal Division sa Customs District Office sa dakbayan sa Sugbu. – BANAT NEWS