BCPC sa 6 Brgys. walay mga gamit

CEBU - Nagpabiling walay gamit ang Barangay Council for the Protection of Children (BCPC) sa unom ka mga barangay sa dakbayan sa Sugbu.

Kini maoy gibutyag ni Annabeth Cuizon, ang chairperson sa Cebu City Commission for the Welfare and Protection of Children (CCCWPC).

Ang unom ka mga barangay nga gitumbok ni Cuizon mao ang Quiot, Mabini, Santa Cruz, San Antonio, Kalubihan ug Tejero.

Gitataw ni Cuizon nga mahinungdanon ang BCPC sa usa ka barangay tungod kay kini giingong maoy motan-aw sa mga panginahanglan sa kabataan.

“Importante kaayo ning BCPC kay kini maoy motutok sa issues and concern sa kabataan sa usa ka barangay,” sumala ni Cuizon.

Gawas niini nidugang si Cuizon nga gimando usab sa Department of Interior and Local Government (DILG) nga himuong functional ang BCPC sa kabarangayan.

Labaw sa tanan niingon ang chairperson sa CCCWPC nga nalatid usab sa Akta Republika 9344 ang pagmugna ug paghimong functional sa BCPC.

Gani nagkanayon si Cuizon nga dunay probisyon sa nahisgutang balaud nga magsilot sa mga barangay kapitan nga dili makahulma niini.

“Naa gyud na sa R.A. 9344 nga matangtang sila sa katungdanan unya duna pay multa nga ipahamtang gyud nila,” dugang pamahayag sa chairperson sa CCCWPC.

 Tungod niini subling giawhag ni Cuizon ang mga kapitan sa unom ka mga barangay sa dakbayan paghimo nang functional sa ilang BCPC.

Gipadayag ni Cuizon nga sila sa CCCWPC andam motabang sa kabarangayan paghatag og technical assistance pagkab-ot og mga programa.

Nasayran nga ang DILG nimando sa kabarangayan pagsumitir og report matag buwan may kalabutan sa ilang mga programa alang sa kabataan.

Apan base sa kasayuran nga nakuha sa Banat News, ang mga barangay nga dili functional ang BCPC mangopya lang sa programa sa ubang barangay.

Kini giingong maoy ilang isumitir ngadto sa DILG aron lang sa pagtuman sa kamanduan sa maong ahensya. – BANAT NEWS