Nagmaoy nga polis mipaarak og armalite

CEBU - Ipaubos sa imbestigasyon sa City Internal Affairs Service (CIAS) sa Cebu City Police Office (CCPO) si PO3 Altelano Ferolino human nipaarak sa iyang armalite tungod sa kahubog niadtong Lunes sa hapon diha sa barangay Camputhaw.

Si PO3 Ferolino sakop sa Cebu City Mobile Group ug nadestino sa Cebu City Bantay Dagat Commission nagtingkagol karon sa Fuente Police Station human sa iyang pagkasikop sa mga sakop sa Mobile Patrol Group.

Matud ni Sr. Supt. Patrocinio Comendador, hepe sa kapulisan sa dakbayan sa Sugbu ang CIAS na maoy mo-imbestigar sa kasong administratiba batok kang PO3 Ferolino.

Makig-coordinate nalang ang buhatan sa Investigation Division Management Branch (IDMB) sa imbestigasyon.

Matud pa ni Comendador nga kun mamatud-ang sad-an si Ferolino ang maximum penalty sa maong salaod ang pagkatangtang sa serbisyo tungod usab kay ang indiscriminate firing usa ka grave offense sa mga sakop sa PNP.

Si Ferolino gireklamo sa iyang upat ka mga silingan niadtong Lunes sa alas 5:30 sa hapon dihang nagpaarak sa iyang Armalite. – BANAT NEWS