50 tinun-an 'gibuwad' sa maestra

CEBU - Mga tinun-an sa Talisay National High School mireklamong gibuwad og upat ka oras sa ilang magtutudlo gumikan lang sa wala nila pagdala og botelya sa usa ka local supplement drink nga gamiton sa ilang tunghaan sa contest.

Ang maong reklamo wala mauyuni sa tsirman sa komitiba sa edukasyon sa dakbayan nga si Konsehal Dennis Basillote tungod kay di lang kini maoy reklamong iyang nadawat kabahin sa maong tunghaan.

Unang reklamong nadawat ni Basillote mao nga may mga magtutudlong wala makatudlo ning bag-uhay lang ug karon nadugangan kini sa gihimo sa usa ka magtutudlo sa 50 niini ka mga tinun-an.

Si Basillote nagkanayon nga tinuod o dili ang maong taho kinahanglan nga magmatngon ang mga magtutudlo ilabi na sa pagprotiher sa mga tinun-an batok sa pangabuso.

Matud niini nga dihang nabati niya ang maong taho sa radyo kagahapon sa buntag nakigkita siya kagahapon sa tanang mga magtutudlo sa maong tunghaan.

Ang prinsipal sa TCNHS nga si Lorena Panilagao uban sa walo ka magtutudlo ang mitambong og seminar sulod niining semanaha ug dunay tulo ka sections ang walay magtutudlo.

Base sa taho nga ang maestra sa first year high school nga si Sweetheart Tayong kinsa adviser sa 70 ka mga estudyante 50 niini ang iyang gibuwad ngadto sa init niadtong Lunes sa buntag tungod kay napakyas og dala og botelya sa maong supplement drink.

Gikataho nga ang maong mga botelya maoy himuong materyales paghimo og Christmas Tree aron maoy ilang entry sa pa-contest sa maong produkto nga diin dunay premyo P3,000-P7,000 alang sa grand winner ug consolation prize P1,000 alang sa mga non-winning entries.

Apan si Tayong ang mihimakak sa maong pasangil ug nagkanayon nga iyaha lang gipalinya ang iyang mga estudyante isip silot tungod sa ilang pagpabadlong ug dili motuman sa iyang mga mando sama sa dili sila paadtuon sa canteen.

Si Tayong ang nagkanayon nga bukas siyang maimbestigahan kabahin sa maong isyu, apan si Basillote midugang nga dili lang si Tayong ang iyang gitumbok sa maong problema.

 Lakip sa gipatawag sa maong opisyal mao ang ubang mga magtutudlo ug mga estudyante mismo ni Tayong, apan ang mga tinun-an gikatahong pulos mihimakak kabahin sa nahisgutang pasangil. – BANAT NEWS