Hustisya gipangayo sa pamilya ni Gerry Giuseppe

CEBU - Hustisya maoy gipangayo sa pamilya sa 19 anyos nga lalaki kinsa gidunggab patay sa lima ka mga batan-ong gidudahang sakop sa gang diha sa eskina Gansiyang ug Oliva sa barangay Punta Princesa, dakbayan sa Sugbu usa na ka semana ang nakalabay.

Si Frances Gatungay, igsuon sa gipatay nga si Gerry Giuseppe   Gatungay, minyo, atol sa press conference kagahapon miapelar ngadto sa mga sakop sa media gumikan sa kalangay sa gihimong imbistigasyon sa kapolisan sa nahitabo sa iyang igsuon.

Matud ni Francis ang mga imbestigador sa Homicide Section dili makig-coordinate kanila. Gani giingnan pa sila nga papangitaon sila og mga testigos.

Nunot niini, ang pamilyang Gatungay mitanyag og P50 mil nga reward alang sa makatug-an si kinsa ang midunggab patay kang Gerry niadtong dayon nang tungang gabii sa Oktobre 28 diha sa nahisgutang lugar nga giingong sakop sa gang nga nagsul-ob niadtong higayona og pulos itom nga T-shirt ug nangita og riot.

Gani sa wala pa mahitabo nga gidunggab patay ang biktima ang lima ka batan-on nangita’g “riot” ug nibuak sa salamin sa awto nga nag-parking niadtong higayona nga gipanag-iya ni Atty. Learson Tabotabo.

Si Gerry giingong gikan siya sa eskuylahan sanglit nagtungha siya sa usa sa mga unibersidad dinhi sa dakbayan sa Sugbu ug naglakaw kining mopauli paingon sa Basak Pardo.

Apan gipahunong siya sa lima ka mga batan-on giingong nagsul-ob og itom nga T-shirt nga gituohang mga sakop sa gang ug gitabangan og dunggab.

Ang biktima daling gihatod sa miresponding sakop sa Mobile Patrol sa Cebu City Medical Center apan duha ka oras ang nakalabay nakabsan sa kinabuhi.

Gusto sa pamilyang Gatungay nga mapaspasan ang dagan sa imbestigasyon sa kapolisan ug hatagan sila kanunay og kalamboan sa imbestigasyon.

Usa sa ilang nasawayan sa mga polis kay matud ni Francis nga sila pa man hinuon ang papangitaon og witnesses.

Dako ilang pagduda nga taga diha ra ang lima ka mga batan-ong gidudahang sakop sa gang tungod kay daghan silang nadunggan nga mga tabi-tabi nga taga diha ra sa Punta   Princesa ang mipatay sa iyang igsuon apan wala lay mobarog nga saksi.   (BANAT NEWS)