Presinto gisulong sa nagpailang NPA

CEBU - Gibana-banang kapin sa napulo ka mga armadong nangangkong mga sakop sa New Peoples Army ang misulong sa La Libertad Police Station ug gikuha ang mga armas sa mga polis lakip na ilang mga butang, apan usa sa mga miatake ang gituuhang namatay human usa ka polis ang misukol niadtong Domingo sa gabii.

Apan ang polis nga misukol nasamdan usab ug giilang si PO1 Karl Mark Jopillo kinsa niadtong tungura diha sa luyong bahin sa police station duol sa prisuhan ug nakabantay sa pagsulod sa mga armadong tawo.

Matud pang Sr. Supt. Agusto Marquez, director sa Negros Oriental Provincial Police Office sa pakighinabi sa Banat News sa telepono kung basehan ang narekober nga sakyanan 11 ngadto sa 12 ka mga armadong tawo ang misulong sa maong police station.

Ang hepe sa maong buhatan nga si Insp. Edgar Depusoy kinsa nagbiyahe padulong sa provincial headquarters niadtong tungura alang unta sa command conference kagahapon mibalik sa agi human mapahibalo sa hitabo.

Sumala pang Marquez ang mga suspek gikatahong migamit og usa ka tiguwang babaye nga miduol sa usa sa onse ka polis nga nag-duty niadtong tungura diha sa gawas kay duna kini reklamo apan pagpasulod sa maong polis sa tiguwang kalit nga mihasmag ang mga armadong lalaki nga diay nipahipi ra diha sa ngitngit.

Matud pa gipahapa dayon ang mga polis sa sulod ug giablihan ang ilang cabinet nga gibutangan sa upat ka M16 Armalite rifles; unom ka .45 ug gipanghimulbolan ang mga polis sa ilang mga cellphone, pitaka, relo ug uban pang personal nga gamit.

Duha ka mga armado ang milipot sa luyo padulong sa prisuhan apan diha si PO1 Jopillo kinsa nakabantay na niadtong tungura ug giunhan pagpusil ang duha hinungdan sa pagkahagba sa usa.

Diha-diha nahitabo na ang sinukliay sa buto tali kanila apan nahurot ang short magazine sa bala ni Jopillo ug nasamdan na usab niadtong tungura sa tuong bitiis hinungdan nga milayat kini sa bintana ug mikamang padulong sa baybayon.

Tungod niini miabot usab ang ubang mga polis sa palibot nga nag-roving ug nakigsinukliay og bala sa mga suspek apan nakaeskapo sila sakay sa usa ka Nissan Urvan nga narekober diha na sa barangay Solongon.

Nagduda si Marquez nga di mga NPA ang mga miatake sahi sa ilang pangangkon gumikan sa ilang gisulti sa mga polis nga “Di ta kontra kay way abusado nga polis sa La Libertad, armas ra ninyo among tuyo, ang inyo rang amo among kontra, si Josy,” nga gipasabot mao si Cong. Jocelyn Limkiaochu.

Dugang nakapaduda kang Marquez mao ang pag-apil og kawat sa mga suspek sa mga pitaka, kwarta, cellphone ug uban pang personal nga gamit sa iyang mga polis nga di sagad buhaton sa mga NPA.

“There are many angles to be investigated, will the NPA take the PNP’s salary? Take their cellphones. Kay ang NPA man gud kung moatake they want to earn “pogi points” sa public. That’s (political) tickling my mind,” asoy pang Marquez.

Dako ang pagtuo ni Marquez nga namatay ang usa sa mga miatake sa mga polis nga napusilan ni Jopillo base sa pamahayag sa mga priso diha sa gihitaboan, gikatahong giguroy na kini sa mga kauban atol sa pag-ikyas.  (BANAT NEWS)