Duha angol sa dinasmagay

CEBU - Pulos angol ang duha ka drayber human magkadinasmagay ang ilang motorsiklong gisakyan didto sa barangay Taloot lungsod sa Argao niadtong Domingo sa alas 12:45 sa udto.

Ang mga naangol mao si Julius Amasa, 28, ulitawo nga taga Taloot ug si Rizal Tan, 22, ulitawo, nga silingan ra usab ni Amasa.

Si PO1 Benjamen Gerozaga sa Argao Police Station mibutyag sa  Banat News nga si Tan kinsa gituohang hubog nga nagmaneho sa iyang Honda Wave gikan sa Poblacion, Argao, puwerting kusoga nga nagpadagan nga walay helmet ug nag-ikis-ikis ang dagan niini.

Gumikan sa naghiwi na nga dinaganan pag-abot niini sa highway sa Taloot nagkadinasmagay gyud ug ang Yamaha DT nga gisakyan ni Amasa gikan sa Simala, paingon sa Poblacion, sa Sibonga.

Tungod sa kakusog sa duha ka motorsiklo pulos kini nangabungkag samtang ang duha nga nagsakay nangalabay ug didto motugpa sa sementadong karsada.

Si Tan kinsa walay helmet maoy nagrabihan samtang si Amasa kay may helmet, igo ra nga nasamad ang agtang ug ubang bahin sa lawas niini.

Ang duha gidali pagdala ngadto sa Isidro Kintanar Memorial Hospital apan gipahatod dayon kini sa dakbayan sa Sugbo tungod sa katalandugon sa ilang kahimtang. (BANAT NEWS)