Ex-convict gipusil patay

CEBU - Usa ka ex-convict gipusil patay didto sa barangay Das, Lotupan siyudad sa Toledo niadtong Sabado sa alas 9:00 sa buntag.

Ang biktima mao si Felomino Algabre Traya, hingkod, minyo, nga taga Das, kinsa usa ka ex-convict tungod sa kasong pagpatay.

Samtang ang suspek mao si Dionisio Panuncialman, hingkod, nga silingan ra usab sa biktima.

Si PO2 Edmund Liston sa Toledo City Police Station mibutyag sa   Banat News nga sa wala pa pusila, migawas sa ilang balay ang biktima kay mopalit og sigarilyo sa tindahan ni Rosecinda Labatis Quillobe, nga ilang silingan.

Apan wala kini kalibotan nga giatangan diay siya sa suspetsado busa wala na kini maabot sa tindahan gipusil kini sa suspek ginamit ang wala pa matino nga kalibre sa armas de fuego.

Ang biktima nasabak sa sentro sa iyang dughan ug diha- diha nahagba nga maoy hinungdan sa iyang kamatayon.

Samtang ang suspek yano ra kaayong misakay sa iyang motorsiklo paingon sa siyudad sa Naga nga direksyon sumala pa sa mga saksi.

Padayon pang gi-imbistigar sa kapolisan ang motibo sa krimin apan gituohan nga dunay pagdumot ang suspek ngadto sa biktima.

Nasayran nga nakapusil –patay usab ang biktima niadtong milabay'ng tuig ug gani bag-o pa lang kining nakagawas gikan sa prisohan. – BANAT NEWS