Bisitang may .45 pistola gipusil-patay

CEBU - Gipusil-patay ang usa ka lalaking taga bukirang bahin dinhi sa dakbayan sa Sugbu nga igo lang niduaw sa iyang mga paryente nga nagpuyo sa lungsod sa Consolacion niadtong Sabado sa alas 5:00 sa hapon atol sa adlaw sa mga santos.

Ang biktima mao si Junrey Pepito Atuel, 27, taga barangay Paril siyudad sa Sugbu apan lumad nga taga Consolacion ang kagikan.

Matud ni SPO2 Rizalino Aligno sa Consolacion Police dihang nahinabi sa Banat News mga buto nalang sa armas ang nadunggan sa mga kabanay sa biktima.

Dihang ilahang gisusi ang dapit diin maggikan ang buto nakit-an nalang ang biktima nga nagbuy-od na sa yuta ug nagkadugo ang luyong bahin sa lawas, dihang ilang gihiling duna kini mga samad pinusilan sa bukobuko.

Wala usab sila makabantay kung si kinsa ang mamumuno tungod kay walay tawo diha sa palibot sa ilang pag-abot.

Sa pagsusi sa mga nangabot nga kapolisan sa patay'ng lawas nakakuha sila og usa ka kalibre .45 pistola sa hawakan niini.

Ang kapulisan naka-recover sab sa crime scene og duha ka kabhang sa bala sa .9mm ug usa ka buhing bala dili layo sa patay'ng lawas sa biktima nga gituohang maoy gigamit sa suspek.

Padayon pang gi-imbestigar sa kapulisan ang maong panghitabo pag-ila sa suspek ug pagtumbok sa motibo niini ug gisubay na usab ang record sa namatay aron pagsusi kung nganong duna kini armas. – BANAT NEWS