Gibawsan sa ig-agaw gipatay

CEBU - Patay ang usa ka 43-anyos nga lalaki human kini unaya sa pagpusil sa iyang pag-umangkon kagahapon sa buntag sa barangay Manipis, dakbayan sa Talisay.

Ang biktima giila sa mga polis nga si Alie Silayan residente sa maong lugar kinsa nakaangkon og samad pinusilan sa tuong bahin sa dughan ug daling gidala sa Talisay City District Hospital sa iyang mga paryente apan wala na kini makaabot nga buhi diha sa maong tambalanan.

Ang suspetsado mao si Edzel Nadera, 29, nagpuyo usab sa nahisgutang barangay ang daling miikyas human sa maong hitabo ug padayon pa kining gipangita sa kapolisan.

 Si SPO1 Oliver Dacua, duty desk officer sa Talisay City Police Station sa pakighinabi niini sa Banat News kagahapon sa hapon nagkanayon kini nga base sa imbestigasyon nila ni SPO2 Joel Wenceslao ug PO2 Lino Diez niadtong Sabado sa gabii, ang anak ni Silayan nga si Cialie ug ang humagbos niining si Jerome Sumango ang nag-inom uban si Nadera.

Dihang nangahubog na kini nagkainitay ang managkabanay nga misangpot sa panaglalis ug sinukmagay.

Si Nadera gitabangan og kulata nila ni Cialie ug sa igsoon niining si Jerome niadtong tungura ug kagahapon sa buntag nibalik ang suspek sa balay sa mga Silayan nga dunay dalang pusil.

Unang nakit-an ni Nadera si Jerome dayon gisukmag kini sa suspetsado ug gitiunan sa dala niining pusil.

Dihang nakit-an ni Alie ang gihimo sa suspek giduol niya kini ug daling gitukmod ang suspetsado hinungdan nga natikay-ang kini diha sa yuta apan gipusil usab siya niini.

Si Wenceslao ug Diez ang mipahigayon og hot pursuit operation kagahapon sa buntag batok kang Nadera apan wala masikop sa maong mga polis ang suspetsado.

Si Dacua nagkanayon nga ang mga paryente ni Alie mibahad nga mopasaka og kaso batok kang Nadera. – BANAT NEWS