44-anyos giluba og pinote

CEBU - Giatngan ug gidunggab gamit ang pinote taliwala sa kamaisan ang usa ka 44 anyos nga lalaki nga paingon na untang mopauli gikan nga nangusina didto sa barangay Lawaan, lungsod sa Dumanjug, niadtong Sabado sa alas 5:30 sa hapon.

Ang namatay nga naputos og samad dinunggaban sa iyang tiyan, dughan ug uban pang dapit sa lawas mao si Mario Llano, 44, minyo ug molupyo sa nahisgutang lugar.

Samtang ang suspek mao si Antonio Dinglasa, hingkod ang panuigon, minyo ug silingan ra sa biktima.

Matud ni SPO1 Julianito Molejon sa Dumanjug Police Station sa dihang nahinabi sa Banat News nga kauban ra sa inoman ang biktima ug suspek ug kanunay gyud kining magkadeperensiya sa higayon nga makainom na kini.

Hinuon gihulagway ni SPO1 Molejon nga maayong tawo ang biktima kun dili makainom apan mawala usab ang hustong pangisip niini ug mangita og kontra sa higayon nga mahubog.

Subay sa inisyal nga imbestigasyon sa kapolisan ang biktima naglakaw kini sa dalan paingon nga mopauli gikan nga nangluto apan pag-abot niini sa kamaisan   giatngan ug gitigbas kini sa suspek gamit ang pinote ug gidunggab-dunggab ang lainlaing dapit sa kalawasan niini nga maoy hinungdan sa kamatayon.

Sa pag-responde sa mga polis nakasibat na ang suspek apan atol sa gilusad niining hot pursuit operation nasikop ra nila kini nianang pagka alas 8:45 sa gabii didto sa barangay Bolyogan mipauli sa ilang lugar ug boluntaryong mitahan sa iyang kaugalingon ngadto sa kanhi kapitan sa barangay nga si Generoso Quirante.

Karong buntag gitakdang ipasaka sa kapolisan ang tukmang kaso batok sa suspek. – BANAT NEWS