Nov. 1 malinawon - PRO7

CEBU - Mas hapsay ug napasabot og maayo ang publiko karon kabahin sa mga gipatumang pamaagi sa awtoridad alang sa kahapsay ug kalinaw atol ning paghinumdum sa mga santos ug sa mga minatay sugod kagahapon.

Kini maoy paghulagway ni Police Regional Office-7 director, Chief Supt. Ronald Roderos kinsa milibot kagahapon sa mga sam-ang dinhi sa Metro Cebu aron pagsigurong ma-check ang gimuntar nga security.

Upat ka mga dagkong sam-ang sa dakbayan gibutangan usab sa security camera diha sa Carreta, Calamba, Cempark ug sa Queen City lakip na mga polis, anti-crime volunteers ug mga tanod.

Si Roderos nagkanayon nga ‘generally peaceful’ ug walay dagkong kagubot may kalambigitan sa Todos Los Santos nga na-report sa tibuok Central Visayas kagahapon.

Mapasalamaton si Roderos sa tri-media nga sa sayo pa miabag na pagpaabot sa publiko sa mga gidiling dad-on sa mga sam-ang sama sa mga mahait nga hinagiban, ilimnong makahubog ug uban pa.

Duna hinuoy pipila ka mga tawong nagdala gihapon niining mga mahait nga hinagiban apan kini ilang gamiton sa paglimpyo ug para sa pagkaon apan kung ikumparar sa nasakmit kaniadto gamay ra kaayo kini.

Sa kinatibuk-an gikan sa buntag hangtud alas 12 sa udto gibutyag ni Sr. Insp. David Señor,Jr. nga 78 ra ka mga nagkalain-laing mga mahait nga butang lakip na mga gamit sa mason ang ilang gisakmit.

Samtang si Sr. Supt. Patrocinio Comendador, hepe sa Cebu City Police Office mibutyag kinsa milibot usab sa mga sam-ang nagkanayon nga dunay augmentation forces gikan sa mga Barangay Intelligence Networks ug mga tanod nga mitabang sa seguridad.

Dunay mga tanod sa mga barangay kansang mga dapit walay mga sam-ang ang gipatabang og bantay diha sa mga sam-ang inabagan usab sa Parish Security Group.

Wala usab kaayo’y nasinating problema sa trapiko sa mga sam-ang gumikan sa gimentinar nga 50-meter radius nga no parking zone.

Apan ang mga sakop sa BIN nga nagdala og mga motorsiklo diha sa Carreta naproblema kagahapon human gipangkarga sa towing service sa City Traffic Office Management ang ilang motor nga ilang giparada.

Nasayran nga walay lugar nga gitugot nga parkingan diha sa maong dapit ug kini susihon pa sa CCPO kinsa maoy nagdumala sa mga BIN kung dunay mga kalapasang nahimo ang mga anti-crime volunteers niini.

Samtang sa dakbayan sa Mandaue, gibutyag ni Supt. Mersan Premne nga nakatala na sila og dul-an 30 mil ka pasahero diha sa North Bus Terminal nga mibiya sugod kaadlawon hangtud alas 11 sa buntag.

Walay mga insidente sa pagpanguot ug pagpangawat nga nakaabot diha sa ilang buhatan diha sa maong mga terminal. – BANAT NEWS