Chiong sisters giduaw ni Roderos

CEBU - Gibisita kagahapon ni Police Regional Office-7 director Ronald Roderos ang lubong sa magsuong Maryjoy ug Jacqueline Chiong diha sa Queen City Memorial Garden sa barangay Mabolo ning dakbayan.

Ang inahan sa magsuong Chiong kinsa maoy bise presidente sa Crusade Against Violence Thelma Chiong mihangop sa pagduaw ni Roderos sa lubong sa iyang mga anak.

Matud pang Chiong nga dako kaayo ang pasalamat niini nga nakab-ot ra gyud ang hustisya sa kamatayon sa iyang anak human mahitabo ang linoog nga pagpatay kanila onse na ka tuig ang milabay.

Mapasalamaton usab kini sa kapolisan tungod sa kahapsay ug kalinaw nga nasinati kagahapon tungod sa mga gipakatap nga mga polis ug anti-crime volunteers.

Bisan wala gyud makit-i ang lawas ni Jacqueline may gibutang gyud nga lapida alang kaniya ipon sa igsuon niini, ang duha gisignit ug giingong gilugos ug gipatay sa mga anak sa mga impluwensyadong pamilya dinhi sa Sugbu.

Nahukmang mabitay mao sila si Paco Larrañaga; Josman Aznar; Rowen Adlawan; James Anthony Uy; Ariel Balansag ug Alberto Caño samtang ang manghod ni Uy nga menor de edad pa niadtong pagkahitabo sa krimen gihukmang mabilanggo sa tibuok kinabuhi, sila kasamtangan karong gibilanggo sa Muntinlupa, National Bilibid Prison.

Apan si Thelma mibutyag nga di gihapon sila mokumpiyansa gumikan kay nasayod kining anak og mga impluwensyadong pamilya ang mga suspek ug di layo ang posibilidad nga mahatagan sila og presidential pardon.

Samtang si Roderos sa iyang bahin nagkanayon nga isip sakop sa kapolisan maisip nga usa siya sa mga crusaders batok sa krimen ilabi na niadtong mga linuog nga mga krimen ug kini maoy hinungdan nga iyahang gibisita ang lubong sa mga Chiong. – BANAT NEWS