Gitulis sa mga bata

CEBU - Gipangita karon sa kapolisan sa lungsod sa Pinamungahan ang tulo ka mga batang gitumbok nga mitulis sa usa ka dalaga diha sa barangay Mangoto sa ilang lungsod niadtong Biyernes sa hapon.

Ang biktimang nagkurog nga nangayog pakitabang sa kapulisan giila nga si Edeza Claire Tangarorang, 18, taga sitio, Dakit barangay Poblacion sa nahisgutang lungsod.

Si Tangarorang nakuhaan sa iyang P2,800 pesos human ang tulo ka suspek nga gibana-banang nagpangidaron lang og 12 ngadto sa 15 anyos nagtinabangay sa pagtulis kaniya.

Matud pa ni PO2 Dominic Pantajo sa Pinamungajan Police Station nga gikahinabi sa Banat News ang biktima nag-inusarang nagmaneho sa motorsiklo gikan sa sitio Bonbon sa barangay Poblacion.

Apan sa paghiabot sa nahisgutang dapit kalit nibabag sa dalan ang tulo ka mga minor de edad nga nagsakay og taxi, ang usa niini nition dayon kaniya og gituuhang kalibre .45 nga pistola diha sa iyang lawas.

Gisundan kini dayon og deklarar og tulis dungan sa pag-ingon nga “ayaw lingi ambi na imo kwarta!” samtang ang duha ka kauban maoy nikuha sa iyang kwarta nga gisuksok sa iyang bulsa.

Human makuha ang kwarta ang tulo daling nisibat sakay sa nagpaabot nga kolor puti nga taxi nga nipaturatoy sa pagpadagan paingon na sa lungsod sa Aloguinsan. – BANAT NEWS