CEBU - Managsuong menor de edad nga mga babaye ang namatay human kini mangalumos sa sapa niadtong Huwebes sa alas 4:30 sa hapon sa sitio Buswang barangay Cambang-ug dakbayan sa Toledo.
Ang nangamatay mao sila si Mary Ann Traña, 10, manghod niini nga si Bernadeth Traña, 7, pulos nagpuyo sa nahisgutang lugar.
Si SPO2 Carmelito Hornales sa Toledo Police Station nga gikahinabi sa Banat News nagkanayon nga disgrasya gyud ang nahitabo sa maong mga bata dihang padulong na unta kining mopauli.
Matud pa niini nga ang managsuong Traña uban sa ilang 7-anyos nga ig-agaw nga si Gina Racaza padulong na untang mopauli sa ilang panimalay ug kinahanglang molabang sa sapa sa Sapangdaku diha ilang lugar.
Sumala pa niini nga samtang naglakaw ang tulo agi sa mga pundok sa balas ug graba sa mga nag-quarry diha sa lugar, ang siete anyos nga si Bernadeth aksidenteng nakatunob sa humok nga bahin niini, naligid kini padulong sa usa sa mga lungag nga may napundong tubig.
Ang maguwang pagkakita sa nahitabo sa manghod nga naunlod ug nagkisi-kisi sa maong lim-aw nga gibana-banang 14 ka tiil ang gilawmon daling miambak aron unta kini luwason.
Apan nasayran nga ang duruha di makamaong molangoy ug parehong nangalumos ug parehong nangatidlom sa ilawom, ang ilang ig-agaw nga 7-anyos maoy nipahibalo sa mga silingan apan naabtan pa og usa ka oras una pa mahaw-as ang duha nga pareho nang patay.
Sumala pa sa kapolisan, Biyernes na sa hapon gipahibalo sa inahan sa mga bata nga si Divina kanila ang kabahin sa nahitabo sa iyang mga anak.
“Wa lang gyo’y mga tawo didto sa dapit mao sigurong wa gilayon madalig tabang pagkatagak sa mga bata…..ang maguwang sab nga dili kamao molangoy nideretso sab og tabang nalumos na hinoon ang duha..luoy intawon kaayo,” sumala pa ni SPO4 Hornales nga gibati og kaluoy sa duha.
Apan bisan pa man niini ilang gisugyot nga ipaubos sa autopsy ang mga patay’ng lawas sa mga biktima aron mahanaw ang pagduda nga may foul-play ang kamatayon nila.
Samtang gikatahong ang quarry sa maong dapit may permit sumala pa sa kapolisan apan wala pa masayri kung duna ba sila’y tulubagon niini gumikan kay duna may namatay sa site sa ilang quarry tungod sa aksidente mugna sa ilang mga lungag. – BANAT NEWS