CEBU - Labing minos tulo ka police station chief sa onse ka presinto sa kapulisan sa dakbayan sa Sugbu ang dili kwalipikado nga muhupot sa ilang katungdanan.
Kini maoy gibutyag ni Cebu City Acting Mayor Michael Rama human niini gipatawag kagahapong adlawa ang mga station commanders sa Cebu City Police Office (CCPO).
Gipatawag sa acting mayor ang mga station chief tungod kay kadaghanan niini giingong bag-o lang sa katungdanan ug wala niya mailhi.
Gitagsa-tagsa ni Rama sa pagpaminaw ang mga station commander ug iyang naobserbahan nga dunay uban niini nga giingong kulang pa ang kapabilidad ug kapasidad.
Ang acting mayor nga maoy chairman sa Police Coordinating Council (PCAC) dismayado usab sa kasamtangang set-up sa kapulisan.
Partikular nga gisaway ni Rama mao ang paglakip sa dakbayan sa gihimong lahugay sa Philippine National Police (PNP) sa tibuok kapupud-an.
Dunay mga rason si Rama nga eksklusibong gipasupot sa Banat News subay sa iyang kadismaya sa gihimo sa nasudnong pamunuan sa kapulisan.
“Number one, Cebu is a tourism hub, Cebu is the Queen City of the South, Cebu is a highly urbanized City unya ubos ra og ranggo ang muhupot og prisinto,” matod ni Rama. – BANAT NEWS