Filinvest napakyas

CEBU - Napakyas ang Filinvest Land Incorporated pagsumitir sa ilang financial statement niadtong tuig 2005 ngadto sa kagamhanan sa dakbayan sa Sugbu maong nalangay ang Joint Venture Committee (JVC) pagdeklarar kanila nga eligible sa tinguha niini sa South Road Properties (SRP).

Ang Filinvest interesado pagpalit og napulo ka ektaryang luna sa SRP ug gawas niini gusto usab nilang mogamit og laing 40 ka ektarya pinaagi sa pagpakig-joint venture sa siyudad sa maong dapit.

Matud sa pangulo sa JVC, City Administrator Francisco “Bimbo” Fernandez nga ang financial statements na lang maoy ilang gipaabot gikan sa Filinvest.

“Sa among pag-evaluate gud kulang pa man ilang mga dokumento pero once nga ilang ma-submit ang financial statement, dali na lang na,” sumala ni Fernandez.

Gitataw sa City administrator nga gikinahanglan una nga madeklarar ang usa ka investor nga eligible una kasugdan ang pormal nga sabot-sabot.

“Kung masumitir na ang eligibility documents sa Filinvest that’s the time nga sila musubmitir sa ilang formal proposal including sa draft sa joint venture,” dugang ni Fernandez.

Niingon ang City administrator nga sa higayon nga ilang makita nga walay kakulian ang proposal sa Filinvest kini ilang iduso sa City Council alang sa ubang proseso.

Apan malaumon si Fernandez nga sulod niining tuiga, mahalinan na ang kagamhanan sa dakbayan sa SRP.

Gawas sa Filinvest gikataho nga dugang mga investor ang interesado usab pagpalit og luna sa SRP, sama sa Pueblo de Oro, SM Prime Holdings ug uban pa.

Samtang ang mga senior citizens sa siyudad nagpaabot usab nga mahalin ang SRP aron mahatagan na ug katumanan ang campaign promise ni Mayor Tomas Osmeña.

Ang mayor nisaad paghatag og tag-usa ka libo ka pesos sa mga senior citizens atol sa ilang birthday ug laing usa ka libo ka pesos matag Disyembre isip pinaskuhan. – BANAT NEWS