Provisional rollback sa plitehan wa pay klaro
CEBU - Dili pa matino sa Land Transportation Franchising and Regulatory Board (LTFRB) dinhi sa Central Visayas kun duna ba gyuy provisional fare rollback dinhi sa tunga-tungang kabisay-an nga mosugod karung Nobiyembre 4 kun sunod semana.
Segun sa taho gikan sa kaulohan nagkanayon ang LTFRB ug ingon man transport groups nga dunay fare rollback apan .50 centavos lang ang kuhaon gikan sa P8 nga minimum nga pletihan isip provisional fare rollback.
Si Romulo Bernardez, regional director sa LTFRB dinhi sa Central Visayas miingon nga karun pang Lunes nila mahibaw-an gumikan kay sa Nobiyembre 4 adunay pagahimuong public hearing sa kaulohan uban sa tanang transport leaders sa bus de pasaheroan ug public utility jeepney (PUJ) gikan sa pipila ka lugar sa Luzon.
Matud ni Bernardez opisyal na unya nilang ipahibaw kung nationwide ba gyud ang pagpatuman sa .50 centavos nga provisional fare rollback sa pletihan.
Nidugang si Bernardez dinhi sa Sugbu mopahigayon usab sila og public hearing sa tanang transport leaders base sa nag-ungot nga petisyon sa fare rollback ni kanhi LTFRB-7 regional director Emmanuel Iway.
Gitataw ni Bernardez dili pa siya makasigurong wagtangon ang add-on nga P10 sa mga taxi cab dinhi sa dakbayan sa Sugbu.
Sa iyang bahin ang presidente sa mga bus operators dinhi sa lalawigan sa Sugbu nga si Nick Villahermosa nagkanayon nga dili pa sila makapatuman og fare rollback.
Kini bisan paman sa P5 nga rollback sa presyo sa lana niadtong miaging adlaw kay hangtud nga dili moabot og tag P40 ang litro sa krudo dili pa sila mopaus-os sa ilang pletihan.
Apan giangkon ni Villahermosa nga dunay pipila ka mga bus operators ang nangolekta og P1 sa matag unang kilometro.
Gani matud niya nga wala gyud sila motuman segun sa gikasabutan nga minimum nga plitehan nga 1.40 sa matag unang kilometro ug nangolekta lang sila og 1.20 sa matag kilometro base sa gikasabotan nilang Gobernador Gwendolyn Garcia.
Usa sa gikabalak-an sa mga transport groups mao ang umaabot nga kapaskuhan diin sagad mokalit lang og saka ang presyo sa lana tungod sa kanihit sa supply gumikan sa mga nasud kansang klima tugnaw niining mga panahuna. – BANAT NEWS
- Latest
- Trending
