Barko Napagngan og makina

CEBU - Luwas ang tanang pasahero ug tripulante sa barkong M/V April Rose human mapagngi og makina sa lawod gibana-banang 50 kilometros gikan sa baybayon sa Isla sa Camotes kagahapon sa kaadlawon.

Base sa taho sa kapitan ngadto sa Philippine Coast Guard Central -Eastern Visayas pinaagi sa District Commander Commodore Rolando Dizon nga nakahinabi sa Banat News kalit napalong ang makina niini.

 Matud pa sa kapitan nga si Capt. Yolando Lipio ang pagkapalong nahitabo gibana-banang alas 3:00 kagahapon sa kaadlawon samtang sila nagpadulong sa Sugbu gikan sa Baybay, Leyte.

Ang maong barko adunay 24 ka mga pasahero ug 14 ka tripulante gikan sa Baybay, Leyte sa milabay’ng gabii ug gikatakda untang moabot sa Pier 3 sa Sugbu alas 5:00 kagahapon sa buntag.

Ang coast guard mipadala og usa ka auxiliary vessel gikan sa Camotes ug maoy gibalhinan sa mga pasahero padung dinhi sa dakbayan sa Sugbu.

Ang barkong M/V April Rose giguyod nalang sa usa ka tugboat nga giabangan sa Rose Shipping Lines pabalik dinhi sa Sugbu.

 Gipaabot pa sa coast guard ang marine protest sa kapitan kabahin sa maong hitabo. – BANAT NEWS