Bodyguard sa mayor 'gidakop' sa PSG

CEBU - Gidakop sa mga sakop sa Presidential Security Group (PSG) ang usa ka polis nga close-in bodyguard ni Ronda Mayor Esteban Sia human kini nagpasiwil-siwil sa iyang service firearm.

Dugang kasaypanan sa maong polis mao ang kapakyas niini pagdala sa iyang badge kon tsapa ug PNP Identification Card atol sa pagbisita ni Presidente Gloria Arroyo sa inagurasyon sa Presidente Diosdado Macapagal Sports and Cultural Complex sa lungsod sa Argao niadtong Huwebes sa alas 3:00 pasado sa hapon.

Ang close-in bodyguard ni Sia nga gi-hold sa mga sakop sa PSG sulod sa usa ka oras hangtud mahuman ang kalihukan mao si PO1 Erwin Pitogo, lumad nga taga Dalaguete ug nadestino sa Ronda Police Station apan gidestino isip close-in bodyguard sa mayor sa maong lungsod.

Hinuon gibutyag ni PO1 Benjamen Gerozaga sa Argao Police Station dihang nahinabi sa Banat News wala ibutang sa blotter ang maong insidente tungod kay didto gi-turn-over sa mga sakop sa PSG si Pitogo kang Cebu Provincial Police director Sr. Supt. Carmelo Valmoria.

Si Valmoria sa iyang bahin nipadayag sa Banat News nga iyahang susihon ang kinatibuk-ang detalye sa hitabo una pa mopakanaug og posibleng silot batok sa maong polis.

Si Valmoria mikuyog kagahapon kang PNP chief Jesus Versoza sa paglibot niini sa mga police stations sa pipila ka mga lungsod sa lalawigan sa Sugbu.

Matud ni PO1 Gerozaga posibleng walay koordinasyon si PO1 Pitogo sa mga sakop sa PSG hinungdan nga gidakop kini ilabina kay gika-report nga nagpasiwil-siwil kini sa iyang armas diha sa gawas nga bahin sa complex samtang didto sa sulod ang Presidente niadtong higayuna.

Samtang si Mayor Sia sa iyang bahin daling nidepensa sa iyang bodyguard dihang na-interview sa Banat News ug nipadayag nga buotan ug dili hambugero si Pitogo sulod sa duha ka bulang pagbantay niini kaniya.

Hinoon gibutyag sa mayor nga mas gituohan pa niya ang pamahayag ni PO1 Pitogo nga human sa hitabo buot kining kilkilan sa usa sa mga sakop sa PSG nga nidakop kaniya.

Matud sa mayor gi-release na unta ang iyang bodyguard sa labaw sa PSG niadtong higayuna human sa gihimong pagsukit-sukit ug human masuta nga tinuod diay nga polis kini apan gilisud-lisud pa gyud kini sa PSG nga nakadakop kaniya ug buot pa unta siyang pangayoan og kwarta. – BANAT NEWS