P1.2 M danyos sa sunog sa Dumanjug

CEBU - Mokabat sa P1.2 milyones ang danyos sa sunog nga milamoy sa panimalay sa usa ka negosyante alas 7:30 niadtong Miyerkules sa gabii sa barangay Tangil lungsud sa Dumanjug.

Si SPO1 Joselito Abella sa Dumanjug Police Station nga gikahinabi sa Banat News miila sa tag-iya sa balay mao si Cesar Tan nga nagnegosyo og general merchandise sa maong dapit.

Matud pa ni SPO1 Abella nga nagsugod ang sunog sa tapahan kon pugon nga giusa ra usab sa panimalay ni Tan lakip na tindahan niini dihang kini nataligam-an.

Sumala pa niini nga ang panimalay ni Tan giusa ra ang bodega sa mga kopras, cargo truck puno sa kopras, mini mart nga gilangkuban sa mga tinda sa bugas ug uban pa ug naapil og kasunog.

Wala nay naabtang masalbar ang kabomberuhan gikan sa Moalboal, ug mga silinganang lungsod.

Bugtong mga baboy diha sa tangkal lang ang wala maapil tungod sa kongkretong paril nga nagbuwag sa tangkal ug sa balay. – BANAT NEWS