Inspeksyon gisugyot

CEBU - Giawhag sa konseho sa dakbayan sa Sugbu ang Bureau of Fire Protection (BFP) partikular na ang Cebu City Fire Department nga mopahigayon og fire safety inspection ug evaluation sa nagkadaiyang mga commercial establishments sa siyudad.

Kini aron masusi kung nakatuman ba sa fire safety requirements ang mga tag-iya ug tagdumala niini isip kabahin usab sa proactive measure sa kabomberuhan.

Apan matod ni Acting Cebu City Fire Marshall Chief Inspector Victor Vibares nga kabahin na sa ilang routine ang pagpahigayon og inspeksyon.

Gani niingon si Vibares nga niadto lang miaging semana 20 ka establisamento sa dakbayan ang nasutang may kalapasan sa fire safety standards. Dili hinoon makahingalan si Vibares niini apan ang nahisgutang mga establisamento giingong ila nang giisyuhan og notisya pagkuriher sa ilang mga kalapasan.

Sagad nga mga kalapasan sa mga establisamento giingong naglakip sa kakuwang o naalihan ang mga fire exits, walay fire extinguishers, depektosong smoke detectors ug uban pa.

“Ato na tong gipadalhan og mga notices naay uban nga gihatagan nato og 30 days to comply ang uban duha ka buwan,” sumala ni Vibares.

Sa pikas bahin gipahibawo ni Vibares nga gipaubos na karon sa heightened alert ang kabomberuhan sa dakbayan subay sa pag-obserbar sa Todos Los Santos ugmang adlawa ug sa adlaw sa mga kalag karong Domingo. – BANAT NEWS