Vidal mipadayag suporta ni Verzosa

CEBU - Si PNP Chief Director General Jesus Verzosa nakadawat og moral support gikan kang Arsobispo Ricardo Cardinal Vidal atol sa pagbisita niini kagahapon dinhi sa dakbayan sa Sugbu.

Ang arsobispo nagkanayon nga supak siya sa panawagan nga pakanaogon si Verzosa sa iyang katungdanan isip direktor sa PNP.

Sa nasayran nga dunay daghang sektor ug mga senador ang nanawagan kang Verzosa nga moluwat sa pagka- hepe sa PNP o ba kaha mo-leave nunot niining nagpadayong imbestigasyon sa nakontrobersyal nga pagdala og daghang salapi sa usa sa mga opisyal sa PNP didto sa Moscow, Russia.

Ang euro scandal kabahin kini sa giingong P6.9 milyones nga gidala ni retired PNP comptroller Elesio dela Paz nga nadakpan sa tugpahanan didto sa Moscow uban sa iyang asawa nga mitambong sa panagtigum sa Interpol.

Si Cardinal Vidal hinuon mitambag kang Verzosa nga ipadayon ang maayong liderato sa PNP tungod kay giisip sa arsobispo nga usa ka hagit sa iyang pagdumala ang gisagobang karon nga mga isyu sa PNP.

Apan midugang ang arsobispo nga angayan lang gyud panalipdan ni Verzosa ang iyang puwersa sa PNP.

Atol sa pagbisita ni Verzosa diha sa Cardinal’s Palace kagahapon sa buntag si Dilaab Foundation Fr. Carmelo Diola nag-abot alang sa signing sa usa ka memorandum of agreement alang sa partnership sa kapolisan ug sa Dilaab Foundation nga maoy modumala sa value formation sa kapolisan dinhi sa nasud.

Si Verzosa atol sa interbiyu sa mga tigbalita kaniya mipasalamat sa maayong pulong sa Cardinal ug sa paghatag og suporta niini sa iyang liderato sa PNP. – BANAT NEWS