CEBU - Human sa pagpasaka og mga kaso batok sa pipila ka mga opisyal sa gobyerno, ang whistleblower nga si Crisologo Saavedra mao na usab karon ang gikiha.
Upat ka mga kanhi kawani ni Saavedra sa iyang "Essence Spa" diha sa SM City Cebu misang-at og reklamo kagahapong adlawa sa National Labor Relations Commission (NLRC-7).
Ang mga reklamante mao sila si Iron Puno, Elviro Quita, Hilda Abante ug Jocelyn Mabanto nga gipanaktak ni Saavedra sa trabaho.
Lakip sa reklamo sa mga kihante mao ang unfair labor practice, illegal dismissal, non-payment of salaries, non-payment of 13th month pay ug uban pa.
Ang reklamo sa kanhi mga kawani sa Essence Spa ni Saavedra gihuptan karon ni labor arbiter Philip Montances sa NLRC-7.
Gitakdang mag-abot ang mga reklamante ug ang gireklamo nga whistblower karong Nobiyembre 11 sa alas 2 sa hapon.
Sa susamang kalambuan, nagtinguha usab ang mga reklamante sa pagdangop sa buhan sa Social Security System (SSS).
Kini tungod usab sa lain nilang pasangil nga wala i-remit ni Saavedra ang ilang SSS contribution sulod sa taud-taud nga panahon.
Sa pikas bahin, dako usab ang posibilidad nga mag-atubang og laing problema sa iyang negosyo nga Essence Spa.
Kini tungod kay nasuta sa Banat News nga walay business permit ang spa sa whistleblower sukad gisugdan ang operasyon niini niadtong tuig 2005.
Mibayad hinuon si Saavedra og business tax sa kagamhanan sa dakbayan niining tuiga apan ang whistleblower kulang pa og P3,987.50.
Matud sa tinubdan nga posibleng masirad-an ang negosyo ni Saavedra diha sa SM kun dunay moreklamo sa City Hall.
"Naa man gyud na sa business tax ordinance nato nga before you engage in any business in the City, you must have a business permit," sumala sa tinubdan.
Si Saavedra sa iyang bahin miasoy sa ABS-CBN nga normal lamang alang sa usa ka negosyante sama niya nga makasugat og problema sa labor.
Andam hinuon atubangon ni Saavedra ang kiha sa iyang mga trabahante. (BANAT NEWS)