CEBU - Usa ka mahuyang kinsa gihagad sa pagpakighilawas sa usa ka kustomer sa ubos kaayong presyo gidunggab human mobalibad kagahapon sa lapas nang alas 12 sa kaadlawon diha sa Sitio Riverside Banawa barangay Guadalupe ning dakbayan.
Ang nalandig sa Cebu City Medical Center (CCMC) giila sa kapolisan nga si Niño Tan, 27, walay trabaho ug nagpuyo sa Verano Compound, Banawa sa nahisgutang barangay.
Si Tan nakaangkon kini og daghang samad dinunggaban sa iyang lawas, buko-buko, kilid sa lawas, walang siko, walang dughan human dunggaba sa nag-inusarang wala mailhing lalaki.
Sa imbestigasyon nila ni SPO1 Rogelio Nedamo ug mga kaubanan sa Homicide Section sa Cebu City Police Office ang biktima niasoy nga padulong na unta siyang mopauli kagahapon sa kaadlawon.
Matud pa niini nga samtang naglakaw siya sa dalan pag-abot sa awa-aw nga lugar sa nahisgutang dapit usa ka wala mailhing lalaki ang miduol kaniya ug mitanyag kini nga makig-sex sa ubos kaayong presyo.
Ang biktima mibalibad gumikan kay wala siya'y kwarta hinungdan nga gikasuko sa lalaki, diha-diha gibira ang iyang buhok ug mibunot sa gidala niining mahait nga hinagiban dayon dunggab sa mahuyang makadaghang higayon.
Ang biktima bisan pa man kun samaran kini nakamaneho pa kini sa pagdagan nga nakapauli sa ilang panimalay ug nakapangayog panabang sa iyang amahan ug mga silingan.
Gidali kini sa pagdala sa tambalanan samtang ang lalaki dali kaayong nahanaw ug wala gyud maabti pa sa mga miresponding kapolisan. (BANAT NEWS)