3 ka magsuon gipamusil, 1 patay

CEBU - Tulo ka managsuong nagsakay’g traysikad gipaulanan og mga bala usa niini namatay diha-diha gilayon mga alas 12:30 kagahapon sa kaadlawon diha sa dalan Camias St. Jude , Phase 1 barangay Bulacao ning dakbayan.

Ang namatay giila sa kapolisan nga si Roberto Baculi, taga dalan Maxipino St. Jude, Phase III sa nahisgutang barangay human kini nakaangkon og samad pinusilan sa iyang ulo ug buko-buko, samtang gi-swerte ang duha ka maguwang nga sila si Carlito Baculi, 39, drayber og traysikad   ug Sulpicio Baculi, 31.

Sa imbestigasyon nila ni SPO1 Rogelio Nedamo ug mga kaubanan sa Homicide Section sa Cebu City Police Office ang managsuon nagsakay sa traysikad nga gimaneho ni Carlito padulong mopauli sa ilang panimalay.

Matud pa nga usa ka tawo nga nagsul-ob og itom nga T-shirt, nagkawo nga nagsunod nga naglakaw sa traysikad kalit lang mipaulan nila’g mga bala.

Naigo sa iyang buko-buko si Roberto samtang ang iyang mga igsuon nga sila si Carlito ug Sulpicio daling nakaambak sa traysikad aron sa pagdagan sa pagpanalipod sa ilang kaugalingon.

Gi-usban sa mamumuno ang ilang igsuon nga si Roberto sa dihang nahibilin sa traysikad pinaagi sa pagpusil sa ulo niini hinungdan sa hinanaling kamatayon niini.

Silang Carlito ug Sulpicio nga nanagan mibalik kini ug misinggit nga “Gipatay nimo ako igsuon” hinungdan nga ang mamumuno midagan usab kini palayo sa dapit.

Apan ang back-up sa mamumuno nga nakasul-ob lang og puti nga T-shirt mipa-ulan na usab nila og mga bala apan gi-swerte gihapon ang managsuon kay wala gihapon sila manga-igo ug misibat ang ikaduhang mamumuno.

Dugang nakuhang impormasyon sa kapolisan ngadto sa chief tanod sa nahisgutang barangay nga si Warren Noquiao nga sa wala pa mahitabo ang maong krimen usa ka drayber og traysikad nga nakasul-ob og puti nga T-shirt ang nangayo’g pakitabang ngadto kanila human mireklamo nga gitigbas sa namatay nga si Roberto. Gawas pa nagpatabang usab kini kanila sa pagkuha sa iyang traysikad nga nahibilin didto sa Phase 1 sa nahisgutang dapit.

Narekober sa kapolisan didto sa crime scene ang usa ka kabhang sa wala matinong kalibre sa armas ingon man sundang nga may gitas-on nga 19 kapin ka pulgadas nga gitas-on nga walay puloan uban sa traysikad.  (BANAT NEWS)